وزیراعظم پاکستان میاں محمد شہباز شریف اور وفاقی وزیر داخلہ سید محسن رضا نقوی کی ہدایت پر اسلام آباد سے غیر قانونی تعمیرات و تجاوزات کے خاتمے کیلئے سی ڈی اے کا شہر کے مختلف علاقوں میں گرینڈ آپریشن تیزی سے جاری ہے۔
شہر میں جاری تجاوزات کے خلاف گرینڈ آپریشن کی نگرانی چیئرمین سی ڈی اے و چیف کمشنر اسلام محمد علی رندھاوا خود کر رہے ہیں۔سی ڈی اے اور ضلعی انتظامیہ کی مشترکہ ٹیمیں اسلام آباد پولیس کی معاونت سے شہر کے مختلف علاقوں میں بلا تفریق انسداد تجاوزات کارروائیاں عمل میں لا رہی ہیں۔ تفصیلات کے مطابق تجاوزات کے خلاف گرینڈ آپریشن میں 26 نمبر چونگی سے بجانب ٹیکسلا جی ٹی روڈ کے دونوں اطراف، ٹی چوک تا روات، سید پور ویلج، لہتڑار روڈ اور دیگر علاقوں میں بھرپور کاروائیاں عمل میں لائی گئیں۔جی ٹی روڈ 26 نمبر چونگی بجانب ٹیکسلا جی ٹی روڈ کے دونوں اطراف 16 کلومیٹر طویل علاقے میں آپریشن کیا گیا۔ اس آپریشن میں تقریباً 95 فیصد سے زائد علاقے کو غیر قانونی قابضین و تجاوزات سے کلئیر کروا لیا گیا۔ ابتک کی کارروائیوں میں 578 ڈھانچوں کو بھاری مشینری کی مدد سے مسمار کرکے سرکاری اراضی واگزار کروالی گئی۔ کار سرکار میں مداخلت کرنے والے 113 افراد کو حراست میں لیکر قانونی کارروائی کا آغاز کردیا گیا ہے۔سی ڈی اے نے ٹی چوک تا روات کے علاقے میں بھی غیر قانونی تعمیرات و تجاوزات کے خلاف بھرپور کارروائیاں کیں۔ جسکے نتیجے میں ٹی چوک تا روات کے علاقے میں 6 کلومیٹر تک کی سڑک سے غیر قانونی تعمیرات و تجاوزات کا خاتمہ کردیا گیا۔ اس طرح مجموعی طور پر ٹی چوک تا روات کے علاقے میں 191 چھوٹی بڑی غیر قانونی تعمیرات و تجاوزات کو مسمار کرکے سرکاری اراضی واگزار کروالی گئی۔اسی طرح سیدپور ماڈل ویلج میں غیر قانونی قابضین سے 370 کنال سرکاری اراضی میں سے 210 کنال سے زائد اراضی مکمل طور واگزار کروائی جاچکی ہے۔ چیئرمین سی ڈی اے نے کہا کہ سید پور کی اپ گریڈیشن اور غیر قانونی تعمیرات سے پاک کرنے سے شہریوں کو بہترین سیاحتی مقام بھی میسر آئے گا۔غیر قانونی تعمیرات و تجاوزات کے خاتمے کیلئے لہتڑار روڈ کے علاقے میں بھی سی ڈی اے نے ضلعی انتظامیہ کے ساتھ مشترکہ کارروائیاں کیں۔ ان کارروائیوں کے دوران 24 کلومیٹر طویل سڑک کو غیر قانونی تعمیرات و تجاوزات سے پاک کرکے سڑک دونوں اطراف سے کلیئر کروا دی گئی۔ اسی طرح ترامڑی چوک تا بنک سٹاپ، علی پور سے ملحقہ شاہراہ کو بھی تجاوزات سے پاک کردیا گیا۔ ترامڑی چوک تا بنک سٹاپ، علی پور تک 3 کلومیٹر سڑک کو دونوں اطراف سے کلئیر کردیا گیا ہے۔ اس طرح مجموعی طور پر 227 غیر قانونی تعمیرات و تجاوزات کے خلاف کامیاب آپریشن کرکے سرکاری اراضی غیر قانونی قابضین سے واگزار کروالی گئی۔چیئرمین سی ڈی اے محمد علی رندھاوا نے کہا کہ ان کارروائیوں کا مقصد اسلام آباد سے ہر طرح کی غیر قانونی تعمیرات و تجاوزات سے پاک رکھنا ہے۔ انہوں نے کہا کہ غیر قانونی تعمیرات و تجاوزات کے خلاف یہ کارروائیاں تسلسل کے ساتھ مستقبل میں بھی جاری رہے گیں۔چیئرمین سی ڈی اے و چیف کمشنر اسلام آباد نے کہا کہ غیر قانونی تعمیرات و تجاوزات کے عمل کو دوبارہ روکنے اور ان کے مکمل تدارک کیلئے ہرممکن اقدامات کریں گے۔ انہوں نے ہدایت کی کہ واگزار کروائی کی گئی اراضی پر ماحول دوست شجرکاری اور باڑ (فینس) بھی لگائی جائے۔ انہوں نے کہا کہ شہر کی خوبصورتی اور منظم منصوبہ بندی کیلئے غیر قانونی قابضین کے خلاف کارروائیاں انتہائی ضروری ہیں۔اس ضمن میں سی ڈی اے نے شہریوں سے تعاون کی اپیل ہے کہ وہ انسداد تجاوزات مہم میں متعلقہ محکموں کے ساتھ بھرپور تعاون کریں اور کسی بھی غیر قانونی قبضے کی صورت میں متعلقہ حکام کو فوراً اطلاع دیں۔
