وزیر بلدیات سندھ سید ناصر حسین شاہ کراچی پریس کلب میں سہون ڈویلپمنٹ اتھارٹی (ایس ڈی اے) کے ملازمین کے احتجاجی کیمپ پہنچ گئے جہاں انہوں نے احتجاج کرنے والے ملازمین سے ملاقات کی، ان کے مسائل سنے اور حکومت سندھ کی جانب سے مطالبات کے حل کی یقین دہانی کرائی۔ اس موقع پر ملازمین کی بڑی تعداد موجود تھی جبکہ پیپلز پارٹی کے رہنماؤں اور متعلقہ حکام نے بھی شرکت کی۔ وزیر بلدیات ناصر حسین شاہ نے کہا کہ چیئرمین بلاول بھٹو زرداری کی واضح ہدایت اور پاکستان پیپلز پارٹی کے منشور کے مطابق عوام کو روزگار فراہم کرنا حکومت کی اولین ترجیح ہے اور کسی بھی ملازم کو بے روزگار نہیں ہونے دیا جائے گا۔ انہوں نے کہا کہ وہ چیئرمین بلاول بھٹو زرداری اور وزیر اعلیٰ سندھ مراد علی شاہ کی ہدایات پر ایس ڈی اے ملازمین کو خوشخبری دینے آئے ہیں اور حکومت سندھ نے خصوصی دلچسپی لیتے ہوئے سہون ڈولپمنٹ اتھارٹی کے ملازمین کا دیرینہ مسئلہ حل کرنے کے لیے عملی اقدامات شروع کر دیے ہیں۔ ناصر حسین شاہ نے کہا کہ ایس ڈی اے کے تمام جائز اور دیرینہ مطالبات مرحلہ وار پورے کیے جا رہے ہیں جبکہ ملازمین کی تنخواہوں کی مسلسل ادائیگی کو یقینی بنانے کے لیے بھی مؤثر حکمت عملی تیار کی گئی ہے۔ انہوں نے کہا کہ حکومت سندھ ایس ڈی اے کے ملازمین کو دیگر سرکاری اداروں میں ایڈجسٹ کرنے کے مختلف آپشنز پر بھی غور کر رہی ہے تاکہ کسی بھی ملازم کا روزگار متاثر نہ ہو۔ وزیر بلدیات نے احتجاجی ملازمین کو یقین دلایا کہ حکومت ان کے مسائل کے مستقل حل کے لیے سنجیدہ اقدامات کر رہی ہے اور ملازمین کے حقوق کا ہر صورت تحفظ کیا جائے گا۔ اس موقع پر احتجاجی ملازمین نے وزیر بلدیات کی یقین دہانی اور حکومتی اقدامات پر اعتماد کا اظہار کرتے ہوئے اپنا احتجاج ختم کرنے کا اعلان کر دیا۔ ملازمین کا کہنا تھا کہ حکومت سندھ اور وزیر بلدیات کی جانب سے مثبت پیش رفت کے بعد انہیں امید ہے کہ ان کے تمام مسائل جلد حل ہو جائیں گے۔ سیاسی و سماجی حلقوں نے وزیر بلدیات کی جانب سے احتجاجی کیمپ کا دورہ اور ملازمین کے مسائل کے حل کے لیے اقدامات کو خوش آئند قرار دیا۔
وزیر بلدیات سندھ سید ناصر حسین شاہ کراچی پریس کلب میں سہون ڈویلپمنٹ اتھارٹی کے ملازمین کے احتجاجی کیمپ پہنچ گئے
