وزیر اعلیٰ بلوچستان میر سرفراز بگٹی اور کور کمانڈر بلوچستان لیفٹیننٹ جنرل راحت نسیم احمد خان نے جمعرات کو محکمہ داخلہ میں صوبائی انٹیلی جنس فیوژن اینڈ تھریٹ اسیسمنٹ سینٹر (PIFTAC) کا باقاعدہ افتتاح کیا یہ جدید مرکز وفاقی قانون نافذ کرنے والے اداروں، صوبائی ایجنسیوں اور ضلعی انتظامیہ کے درمیان بہتر رابطہ اور مؤثر ہم آہنگی کو فروغ دینے کے مقصد سے قائم کیا گیا ہے۔ پفٹیک کے تحت پولیس، لیویز فورس، کاؤنٹر ٹیررازم ڈیپارٹمنٹ، فرنٹیئر کور، ایف آئی اے، خفیہ ادارے، کسٹمز اور دیگر محکمے ایک ہی پلیٹ فارم پر حقیقی وقت (Real-time) میں معلومات کے تبادلے اور بروقت خطرات کی نشاندہی کے عمل میں شامل ہوں گے یہ مرکز اسلام آباد میں قائم نیشنل انٹیلی جنس فیوژن اینڈ تھریٹ اسیسمنٹ سینٹر (NIFTAC) سے ڈیجیٹل طور پر منسلک ہے جس کے ذریعے معلومات کا تبادلہ دو طرفہ بنیادوں پر اضلاع سے وفاقی سطح تک اور وفاقی اداروں سے بلوچستان کے تمام اضلاع تک ممکن ہوگا اس نظام سے صوبے کو دہشت گردی، منظم جرائم، فرقہ وارانہ خطرات اور اہم تنصیبات کو درپیش خدشات کے بارے میں بروقت الرٹس موصول ہوں گے اس موقع پر وزیر اعلیٰ بلوچستان میر سرفراز بگٹی نے کہا کہ پفٹیک کے قیام سے صوبے کی استعداد کار میں نمایاں اضافہ ہوگا اور اب صوبہ ایسے خطرات کو بروقت شناخت اور ناکام بنانے کے قابل ہو گا جو امن و استحکام کے لیے چیلنج بن سکتے ہیں انہوں نے سول و عسکری اداروں کی مشترکہ کاوشوں کو سراہتے ہوئے کہا کہ اس مرکز کا قیام قومی سلامتی اور صوبائی ہم آہنگی کے لیے ایک اہم پیش رفت ہے اس موقع پر ایڈیشنل چیف سیکرٹری داخلہ حمزہ شفقات نے بریفنگ دیتے ہوئے بتایا کہ پفٹیک صوبے بھر میں سکیورٹی صورتحال کی جامع ڈیجیٹل تصویر (digital picture) برقرار رکھے گا اور صوبائی و ضلعی قیادت کو خطرات کی منظم تشخیص (structured threat assessment) فراہم کرے گا تاکہ بروقت اور مؤثر کارروائی ممکن بنائی جا سکے وزیر اعلیٰ بلوچستان میر سرفراز بگٹی نے کہا کہ یہ مرکز بلوچستان میں امن، ترقی اور عوامی تحفظ کے لیے ایک سنگِ میل ثابت ہوگا اور سول و عسکری اداروں کے درمیان اعتماد و اشتراک کو مزید مضبوط بنائے گا
