وزیراعلیٰ سندھ سید مراد علی شاہ نے مائل اسٹونز سینٹر فار کاگنیٹو اینڈ لینگویج ڈویلپمنٹ کا دورہ کیا، جو حکومت سندھ کے ڈیپارٹمنٹ آف ایمپاورمنٹ آف پرسنز ود ڈس ایبلٹیز (ڈی ای پی ڈی) کا ایک اہم شراکت دار ادارہ ہے۔ وزیراعلیٰ سندھ نے مرکز میں خصوصی ضروریات کے حامل بچوں کو فراہم کی جانے والی مختلف سہولیات اور تعلیمی پروگرامز کا جائزہ لیا۔ کلفٹن میں واقع مرکز پہنچنے پر سیکریٹری ڈی ای پی ڈی طحٰہ فاروقی اور مائل اسٹونز کی ٹرسٹی فوزیہ جاوید حسین نے سید مراد علی شاہ کا استقبال کیا۔ دورے کے دوران وزیراعلیٰ سندھ نے ادارے کے مختلف شعبوں کا معائنہ کیا اور نیورو ڈائیورجنٹ بچوں کو فراہم کی جانے والی تعلیمی، علاج معالجے اور بحالی کی سہولیات کا جائزہ لیا۔ وزیراعلیٰ سندھ نے طلبہ اور اساتذہ سے بھی ملاقات کی اور ان کی سرگرمیوں اور کامیابیوں میں گہری دلچسپی کا اظہار کیا۔ انہوں نے خصوصی ضروریات کے حامل بچوں کو معیاری تعلیم، تھراپی اور بحالی کی خدمات فراہم کرنے کے لیے ادارے کی کاوشوں کو سراہا۔ مائل اسٹونز کی ٹرسٹی فوزیہ جاوید نے وزیراعلیٰ سندھ کو بریفنگ دیتے ہوئے بتایا کہ مائل اسٹونز کا قیام 1998ء میں عمل میں آیا تھا اور ادارہ ڈاؤن سنڈروم، آٹزم، سیریبرل پالسی، نشوونما میں تاخیر اور فریجائل ایکس سنڈروم سمیت خصوصی ضروریات رکھنے والے افراد کو جامع تعلیم اور معاونت کے ذریعے بااختیار بنانے کے لیے کام کر رہا ہے، تاکہ وہ ایک بھرپور اور باوقار زندگی گزار سکیں۔ مرکز ہر بچے کے لیے انفرادی ضروریات کے مطابق مکمل تعلیمی اور بحالی کا پروگرام فراہم کرتا ہے۔ دیگر اداروں کے برعکس، مستحق طلبہ کو یہاں تمام خدمات مفت فراہم کی جاتی ہیں۔ اس موقع پر گفتگو کرتے ہوئے وزیراعلیٰ سندھ سید مراد علی شاہ نے کہا کہ مائل اسٹونز خصوصی بچوں کی تعلیم، تربیت اور بحالی کے شعبے میں قابلِ تحسین کردار ادا کر رہا ہے۔ انہوں نے اس عزم کا اعادہ کیا کہ سندھ حکومت خصوصی افراد کی تعلیم، بحالی اور بااختیاری کے لیے بھرپور تعاون جاری رکھے گی۔ مائل اسٹون چیریٹیبل ٹرسٹ کی جانب سے منعقدہ تقریب سے خطاب کرتے ہوئے وزیراعلیٰ سندھ نے کہا کہ ٹرسٹ 1998ء سے بچوں اور ان کے خاندانوں کی خدمت کر رہا ہے اور جامع تعلیم کے شعبے میں ایک مثالی ادارے کے طور پر ابھرا ہے۔ انہوں نے کہا کہ مائل اسٹونز پاکستان کا پہلا دو لسانی اسکول ہے جو نیورو ڈائیورجنٹ بچوں کے لیے مختص ہے، جن میں آٹزم اسپیکٹرم ڈس آرڈر، ڈاؤن سنڈروم، سیریبرل پالسی اور دیگر نشوونمائی مسائل کے شکار بچے شامل ہیں۔ وزیراعلیٰ سندھ نے کہا کہ ہر بچے کو معیاری تعلیم، تھراپی اور کامیابی کے مساوی مواقع تک رسائی حاصل ہونی چاہیے۔ انہوں نے مستحق خاندانوں کے لیے فیس میں رعایت فراہم کرنے کے ادارے کے اقدام کو بھی قابلِ تحسین قرار دیا۔ سید مراد علی شاہ نے کہا کہ مائل اسٹونز میں ہر استاد کے مقابلے میں صرف دو طلبہ کا تناسب انفرادی توجہ اور مؤثر تعلیمی نتائج کو یقینی بناتا ہے۔ انہوں نے بتایا کہ سندھ حکومت کے ڈیپارٹمنٹ آف ایمپاورمنٹ آف پرسنز ود ڈس ایبلٹیز (ڈی ای پی ڈی) نے 2025ء میں مائل اسٹونز کی معاونت شروع کی اور اس کے بعد سے ادارے کو خصوصی آلات کی فراہمی اور انتظامی اخراجات کے لیے معاونت فراہم کی جا رہی ہے۔ وزیراعلیٰ سندھ نے مشاہدہ کیا کہ سندھ حکومت کی معاونت سے مرکز کی تعلیمی اور علاج معالجے کی سہولیات میں نمایاں بہتری آئی ہے۔ انہوں نے زور دیا کہ خصوصی بچوں کو بہترین ممکنہ تعلیمی اور طبی سہولیات فراہم کرنا ان کی حکومت کی اہم ترجیحات میں شامل ہے۔ سید مراد علی شاہ نے یقین دلایا کہ سندھ حکومت خصوصی افراد کے لیے کام کرنے والے اداروں کی معاونت جاری رکھے گی اور مائل اسٹونز میں جدید ترین، اسٹیٹ آف دی آرٹ سہولت کے قیام کے لیے بھی تعاون کرے گی۔ وزیراعلیٰ سندھ نے ادارے کے اساتذہ، تھراپسٹس اور عملے کی لگن کو سراہتے ہوئے کہا کہ ان کی کاوشیں ایک زیادہ جامع، ہمدرد اور بااختیار سماج کی تشکیل میں مددگار ثابت ہو رہی ہیں۔ وزیراعلیٰ سندھ نے اپنے خطاب کے اختتام پر کہا کہ خصوصی بچوں کی تعلیم اور بحالی میں سرمایہ کاری کے ذریعے ہم ایسا سماج تشکیل دے سکتے ہیں جہاں ہر فرد بااختیار ہو اور ترقی کرنے کے مساوی مواقع حاصل کر سکے۔
وزیراعلیٰ سندھ سید مراد علی شاہ کا مائل اسٹونز سینٹر فار کاگنیٹو اینڈ لینگویج ڈویلپمنٹ کا دورہ
