*سندھ حکومت کا مستقل ملازمتوں کے بجائے کنٹریکٹ پر بھرتیوں کا منصوبہ، بل کابینہ اجلاس میں پیش ہوگا*

حکومتِ سندھ نے سرکاری ملازمتوں کے نظام میں بڑی تبدیلی کرتے ہوئے مستقل ملازمتوں کے بجائے کنٹریکٹ پر بھرتیوں کے لیے ایک مسودۂ قانون تیار کرلیا ہے۔ یہ بل، جس کا عنوان ہے "سندھ کنٹریکٹ اپائنٹمنٹس (CPS-01 سے 05 اور CPS-06 سے 08) ایکٹ 2025″، سندھ کابینہ کے آئندہ اجلاس میں 7 اگست 2025 کو منظوری کے لیے پیش کیا جائے گا۔اس مجوزہ قانون کا مقصد پے اسکیل CPS-01 سے CPS-08 تک کے ملازمین کی بھرتی کو معاہداتی بنیادوں پر منتقل کرنا ہے۔ بل کی منظوری کی صورت میں، مستقبل میں نئی بھرتیاں کنٹریکٹ پر کی جائیں گی، جو موجودہ سرکاری ملازمتوں کے ڈھانچے میں ایک نمایاں تبدیلی ہوگی۔حکام کے مطابق، اس اقدام کا مقصد مالی بوجھ میں کمی اور انتظامی کارکردگی میں بہتری ہے۔ تاہم، سرکاری ملازمین، یونینز اور سول سوسائٹی کی جانب سے اس مجوزہ قانون پر خدشات کا اظہار کیا جا رہا ہے، جنہیں ملازمت کے تحفظ، سروس اسٹرکچر اور ترقی کے مواقع کے حوالے سے تشویش لاحق ہے۔امید کی جا رہی ہے کہ کابینہ اجلاس کے بعد اس بل کی مزید تفصیلات، نفاذ کا طریقۂ کار اور موجودہ ملازمین کے حقوق سے متعلق وضاحتیں سامنے آئیں گی۔