پنجابی سنگت پاکستان دا ہفتاوار اکٹھ 21 ستمبر 2024 نوں شامیں ست وجے پلاک دے کیفے ہال اچ ہویا۔ ایس اکٹھ اچ پنجاب دی جنگِ آزادی دے سورمے رائے احمد خاں کھرل تے اوہدے ساتھیاں نوں سلامی دتی گئی۔
اکٹھ دی پردھانگی پنجابی زبان دے اُگھے لیکھک ، پارکھ تے کھوجکار ڈاکٹر سعید خاور بھٹا ہوراں کیتی۔ اکٹھ دے اچیچے پراہنے سوجھوان تے شاعر راجا صادق اللہ صاحب ہان۔ پنجابی سنگت پاکستان دے ایڈیشنل سیکرٹری محمد زوہیب عالم ہوراں سعید بھٹا صاحب دی کتاب “نابر کہانی” وچوں خوشی میراثی ولوں کیتی رائے احمد خاں کھرل دی کتھ لہندی بولی دے انگ وچ بڑے ای سُچج نال پڑھ کے سُنائی۔ پنجاب یونیورسٹی دے پڑھیار تے شاعر امتیاز انجم ہوراں کتھ اچ شامل رائے احمد خاں کھرل تے ہور سورمیاں دے ڈھولےپڑھے۔ سیکرٹری سنگت افضل ساحر ہوراں آزادی اَ تے رائے احمد خاں کھرل بارے راجا صادق اللہ دی لکھی نظم پڑھی، تے ڈھیر سلاہنا کھٹی. اخیر اُتے . ڈاکٹر سعید بھٹا ہوراں پردھانگی وچار سانجھے کیتے تے اکٹھ سِرے چڑھیا۔
افضل ساحر ہوراں مڈھلی گل کردیاں رائے احمد خاں کھرل دی بہادری تے اُنہاندے سیان پؤہ بارے آکھیا کہ پنجاب دے ایہناں سورمیاں اُتے سانوں مان اے، ایس دھرتی دے پُتراں انگریزاں نال لڑ کے پنجابی انکھ دی لج رکھی۔ آپدے سِر دے کے ایس دھرتی دے لعل ہون دا پورا مُل موڑیا۔
راجہ صادق اللّٰہ ہوراں نے آزادی دے ایہناں سورمیاں تے پنجاب وچ بہادری دی روایت بارے تواریخی گلاں کیتیاں. اوہناں اپنے وڈکیاں بارے وی دس پائی، جو راجوری دے راجے ہائن، رنجیت سنگھ دے سنگی ہان تے، اوہدے مر جان پچھوں وی اوہناں 1857 توں پہلیاں جنگاں وچ پنجابی فوج دا بھرواں ساتھ دتا. اوہناں پنجابیاں دی اجوکی سیہان سکت تے تکنی بارے وی وچار کیتے. اخیر تے ڈاکٹر سعید بُھٹا ہوراں پردھانگی وچار سانجھے کردیاں آکھیا ،، بئی بڑے چِر پچھوں میں ویکھیا اے کہ لوکاں کسے اکٹھ اچ ہوون آلیاں گلاں نوں ایڈا ٹِک کے تے ایڈے سواد نال سُنیا ہووے.،، اوہناں اپنی کھوج دے سفر اچ آون آلیاں اوکڑاں بارے گل کیتی۔ تے رائے احمد خاں کھرل دی مہاراجا رنجیت سنگھ نال سانجھ ، بھرپن تے یاری بارے کجھ نویاں تے پِیڈھیاں گلاں دسیاں۔ اوہناں لوکاں دے ہِک پرانے اعتراض دا وی جواب دتا کہ بئی سعید بھٹا خورے جان بجھ کے اپنیاں لکھتاں اندر سِکھاں تےمسلماناں دی یاری دا روپ وکھاندے نیں۔ اوہناں دسیا بئی کِویں رائے احمد خاں کھرل دے دادے رائے صالح تے مہاراجا رنجیت سنگھ دی گھر آلی رانی نکائن دے وڈکے دا سانگا بنیا، جندھی وجھا توں رانی دا خاندان تے خود مہاراجا رنجیت سنگھ وی رائے احمد خاں کھرل ہوراں دا ڈاڈھا حیا کردے ہان۔ ایس توں اَڈ بُھٹاصاحب نے 1757 اچ انگریزاں ہتھوں بنگال دے نواب سراج الدولہ دی شکست بارے دسیا تے ایس نکتے اُتے چانن پایا بئی 1757 توں 1857 تک بنگال دی سرحد پنجاب دے نال ہوون دے باوجود انگریز پبجاب تے قابض نہ ہو سکیا۔ اوہناں دسیا کہ انگریز مہاراجا رنجیت سنگھ دے بارے آکھدا ہندا ہا کہ ایس صحت مند بڈھے دے مرن تک سانوں انتظار کرنا پوے گا۔ اوہناں دسیا کہ مہاراجا رنجیت سنگھ دریائے ستلج استعمال کرن تے انگریزاں کولوں ٹیکس وی لیندا ہائی۔ اوہناں رائے احمد خاں کھرل، مراد فتیانہ تے1857 دی جنگِ آزادی دے سورمیاں بارے بھرویں ویروے کیتے تے سنن آلیاں دے ذوق دا کُنّا کناں تائیں بھر چھڈیا۔ اکٹھ وچ سٹھ توں ودھ دوستاں رلت کیتی. اخیر تے چاہ پانی ہویا ، گروپ فوٹو چِھکیجا تے سبھ گھرو گھری.
