جشنِ رحمۃ للعالمین ﷺ کے سلسلے میں الحمرا ہال لاہور میں ایک پروقار "نونہال سیرت کانفرنس” کا انعقاد کیا گیا، جس کا موضوع تھا: ” صدق و امانت: سیرتِ نبوی ﷺ کا نمایاں پہلو”۔
تقریب کی صدارت نامور صحافی جناب مجیب الرحمن شامی نے کی جبکہ مہمانانِ خصوصی میں اسکالر ڈاکٹر نوید الٰہی، ممتاز شاعر ڈاکٹر نبیل احمد نبیل اور مقبول شاعر و مصنف پروفیسر ناصر بشیر شامل تھے۔ معزز مہمانانِ گرامی نے موضوع کی مناسبت سے سیرتِ طیبہ ﷺ کے مختلف پہلوؤں پر روشنی ڈالی اور سچائی و امانت داری کو معاشرتی بہتری کے لیے ناگزیر قرار دیا۔اس روح پرور تقریب میں ننھے مقررین نے بھی بھرپور شرکت کی اور سیرتِ رسول ﷺ کے حوالے سے نہایت متاثر کن تقاریر پیش کیں۔ نونہال مقررین نے اس امر پر زور دیا کہ ہمیں ہمیشہ سچ بولنا چاہیے کیونکہ سچائی انسان کو عزت، وقار اور دلی سکون عطا کرتی ہے، جبکہ جھوٹ رسوائی اور ذہنی پریشانی کا سبب بنتا ہے۔ اس موقع پر محترمہ سعدیہ راشد نے اپنے پیغام میں کہا کہ امانت صرف مال و دولت کی حفاظت کا نام نہیں بلکہ ہر ذمہ داری، وعدہ، عہد اور قول و قرار بھی امانت میں شامل ہیں۔ ہمیں چاہیے کہ ہم ان سب میں دیانت داری اور سچائی سے کام لیں۔”تقریب کے اختتام پر نعتیہ مشاعرے کا اہتمام بھی کیا گیا جس میں نونہال شعراء نے بارگاہِ رسالت ﷺ میں گلہائے عقیدت پیش کیے۔ سامعین نے دل کھول کر ننھے نعت گو شعراء کی حوصلہ افزائی کی۔ بعد ازاں مہمانان گرامی نے اپنے تاثرات پیش کرتے ہوئے کہا کہ نونہال سیرت کانفرنس ایک ایسی مثبت سرگرمی تھی جو نئی نسل کے دلوں میں سیرتِ رسول ﷺ کی روشنی بکھیرنے کا ذریعہ بنی اور حاضرین کو سچائی، دیانت داری اور امانت داری جیسے عظیم اوصاف کو اپنانے کا درس دیا۔
