صوبائی ورکنگ پارٹی اجلاس میں مختلف سیکٹرز کی 3مختلف ترقیاتی سکیموں کیلئے 4ارب روپے سے زائد فنڈز کی منظوری

پنجاب پلاننگ اینڈ ڈویلپمنٹ بورڈ نے مالی سال 2023-24کے صوبائی ڈویلپمنٹ ورکنگ پارٹی کے 50ویں اجلاس میں مختلف سیکٹر زکی 3ترقیاتی سکیموں کے لیے مجموعی طور پر 4ارب 69کروڑ 72لاکھ19 ہزار روپے فنڈز کی منظوری دی۔ اجلاس کی صدارت چیئرمین پی اینڈ ڈی بیرسٹر نبیل احمد اعوان نے کی۔

صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں راولپنڈی ڈویژن میں چیف منسٹر پلانٹس برائے پاکستان گرین پنجاب انیشیٹو کیلئے 1ارب روپے، پنجاب میں موٹرویز کے لئے ایمبولینس سروس کی فراہمی کیلئے 70کروڑ روپے اور لاہور رنگ روڈ کے قریب گول چکر پر بیدیاں روڈ کے ساتھ انڈر پاس کی تعمیر کیلئے 2ارب 99کروڑ 72لاکھ 19ہزار روپے شامل ہیں۔

اجلاس میں صوبائی سیکرٹری پی اینڈ ڈی بورڈ ڈاکٹر آصف طفیل سمیت چیف اکانومسٹ ناصر اقبال ملک، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔