وزیراعلیٰ سندھ مراد علی شاہ نے کہا ہے کہ آئیڈیاز 2024 سے نہ صرف پاکستان کے عالمی شراکت داروں سے اسٹریٹجک تعلقات بہتر ہوں گے بلکہ پاکستان سمیت دنیا بھر کے وفود، کاروباری نمائندوں، دفاعی حکام اور اسلحہ سازوں کے درمیان تجارتی رابطوں میں بھی اضافہ ہوگا۔
یہ بات انہوں نے بارہویں بین الاقوامی دفاعی نمائش و سیمینار۔۔۔ آئیڈیاز 2024 کی اسٹیئرنگ کمیٹی کے تیسرے اجلاس سے خطاب کرتے ہوئے کہی۔ صوبائی وزرا، میجر جنرل اسد نواز خان ہلال امتیار ( ملٹری) ڈی جی ڈی ای پی او ، چیف سیکریٹری آصف حیدر شاہ، وفاقی وزرا ، صوبائی حکومت، مسلح افواج ، قانون نافد کرنے والے اداروں کے نمائندگان اور دیگر نے اجلاس میں شرکت کی۔
وزیراعلیٰ سندھ نے اجلاس میں کہا کہ بارہویں آئیڈیاز 2024 کے انعقاد کےلیے تفصیلی انتظامات کو حتمی شکل دی جائے۔ آئیڈیا 2024 کا انعقاد 19 سے 22 نومبر تک کراچی ایکسپو سینٹر میں ہوگا۔
مراد علی شاہ نے کہا کہ آئیڈیاز سنہ 2000 میں آغاز کے بعد سے قومی اور بین الاقوامی دفاعی صنعت کےلیے سنگ میل کی حیثیت اختیار کرگیا ہے۔ ہر دو سال بعد ہونے والی اس نمائش نے جدید ٹیکنالوجی کی نمائش اور معلومات کے تبادلے کے باعث پاکستان اور بیرون ملک تیزی سے مقبولیت حاصل کی ہے۔
وزیراعلیٰ سندھ نے کہا کہ آئنڈیاز اب دنیا بھر میں مقبول ہے۔ یہ ہمارے بین الاقوامی شراکت داروں کے ساتھ گہرے اور دوطرفہ فائدے پر مبنی تعلقات کی علامت ہے۔ کانفرنس عالمی امن، استحکام اور خوشحالی کی طرف پیش قدمی کےلیے ایک مشترکہ پلیٹ فارم فراہم کرتی ہے جہاں غیرملکی وفود، دفاعی کمپنیاں اور رائے عامہ کے نمائندے مل کر آج کی دفاعی اور سیکیورٹی چیلنجز پر تبادلہ خیال کرتے ہیں۔
وزیراعلیٰ سندھ نے کہا کہ محتاط منصوبہ بندی اور غیرمحسوس انتظامات کی اہمیت انتہائی بڑھ گئی ہے۔ آج کا اجلاس اس لیے اہم ہے کہ یہ ہمیں مختلف اداروں اور محکموں کی فراہم کردہ منصوبہ بندی کو ہم آہنگ کرنے میں مدد دےگا۔ آپ کا اجتماعی عزم اور تعاون آئیڈیاز 2024 کے کامیاب انعقاد کےلیے اہم ہے جو مجموعی طور پر پاکستان کےلیے کامیابی ہوگی۔ انہوں نے یقین دہانی کرائی کہ ان کی حکومت اس غیرمعمولی نمائش کے انعقاد کےلیے تمام مدد اور تعاون فراہم کرے گی۔
دفاعی حکمت عملی کی اس اہم ترین نمائش کےلیے قومی سطح کی تیاریوں کے دوسرے سیشن کی صدارت ڈائریکٹر جنرل ڈی ای پی او میجر جنرل اسد نواز خان ہلال امتیار ( ملٹری) نے کی۔
اجلاس کے دوروان انہیں مختلف صوبائی محکموں، مسلح افواج اور قانون نافذ کرنے والے اداروں کی جانب سے انتطامی، سیکیورٹی اور سپورٹ منصوبوں کی تکمیل کے بارے میں آگاہ کیا گیا۔
سیشن کے اختتام پر ڈی جی ڈی ای پی او نے بتایا کہ ایونٹ میں روایت کے مطابق جدید ترین دفاعی ٹیکنالوجی کی نمائش، بین الاقوامی سیمینار، ثقافتی شو، تاجروں کے دوطرفہ اور تاجروں کے حکومت کے ساتھ رابطوں سمیت کئی قابل ذکر سرگرمیاں ہوں گی۔
انہوں نے یہ بھی اعلان کیا کہ کراچی کے شہریوں کے لیے خاص طور پر کراچی شو کا انعقاد 21 نومبر 2024 کو نشان امتیاز سی ویو پر کیا جائےگا۔ اجلاس کے اختتام پر ایونٹ مینجر سی ای او بدر سولیوشنز زوہیر نصیر نے کہا کہ پاک فوج، وفاقی و صوبائی حکومت اور قانون نافذ کرنے والی ایجنسیوں کے تعاون سے آئیڈیاز 2024 کا انعقاد احسن طریقے سے ہوگا۔ اجلاس کے دوران تمام سرکاری تنظیموں اور محکموں نے آئیڈیاز 2024 کے کامیاب انعقاد کے مکمل تعاون کے عزم کا اظہار کیا
