وزیر بلدیات، ہاؤسنگ و ٹاؤن پلاننگ سندھ سید ناصر حسین شاہ نے کہا ہے کہ حکومت سندھ اعلیٰ تعلیم، تحقیق، جدت اور جدید ٹیکنالوجی کے فروغ کو صوبے کی ترقی اور نوجوان نسل کے روشن مستقبل کے لیے بنیادی اہمیت دیتی ہے۔ سندھ حکومت سرکاری جامعات کو مالی معاونت، بنیادی ڈھانچے کی بہتری، تحقیقی منصوبوں اور ڈیجیٹل مہارتوں کے فروغ کے ذریعے مستحکم بنانے کے لیے اقدامات کر رہی ہے تاکہ سندھ کے نوجوان بدلتی ہوئی عالمی معیشت اور جدید ٹیکنالوجی کے تقاضوں سے ہم آہنگ ہو سکیں۔ ان خیالات کا اظہار انہوں نے این ای ڈی یونیورسٹی آف انجینئرنگ اینڈ ٹیکنالوجی میں منعقدہ 16ویں بین الاقوامی سول انجینئرنگ کانفرنس سے خطاب کرتے ہوئے کیا۔ ناصر حسین شاہ نے کہا کہ آج کا دور علم، تحقیق، جدت اور ٹیکنالوجی کا دور ہے، جس میں کسی بھی ملک اور معاشرے کی ترقی کا انحصار اس بات پر ہے کہ وہ اپنے نوجوانوں کو جدید علوم اور پیشہ ورانہ مہارتوں سے کس حد تک آراستہ کرتا ہے۔ سندھ حکومت اس حقیقت سے بخوبی آگاہ ہے کہ اعلیٰ تعلیم کے ادارے محض ڈگریاں دینے کے مراکز نہیں بلکہ قومی ترقی، معاشی استحکام اور سماجی تبدیلی کے اہم ستون ہیں۔ انہوں نے کہا کہ صوبائی حکومت سرکاری جامعات کو مالی معاونت فراہم کرنے کے ساتھ ساتھ ان کے بنیادی ڈھانچے کی ترقی، جدید تعلیمی سہولیات کی فراہمی، تحقیقی سرگرمیوں اور ڈیجیٹل مہارتوں کے فروغ کے لیے مختلف اقدامات کر رہی ہے۔ گوگل اور دیگر بین الاقوامی شراکت داروں کے تعاون سے شروع کیے گئے پروگرام بھی اسی وسیع تر حکمت عملی کا حصہ ہیں، جن کا مقصد نوجوانوں کو جدید ڈیجیٹل معیشت کے لیے تیار کرنا اور انہیں عالمی سطح پر روزگار اور کاروبار کے نئے مواقع سے مستفید ہونے کے قابل بنانا ہے۔ وزیر بلدیات سندھ نے کہا کہ ہمارا وژن ہے کہ سندھ کے طلبہ، اساتذہ اور محققین کو مصنوعی ذہانت، جدید انجینئرنگ، ڈیجیٹل ٹیکنالوجی اور دیگر ابھرتے ہوئے شعبوں میں آگے بڑھنے کے بھرپور مواقع فراہم کیے جائیں۔ نوجوانوں کو صرف مقامی ضروریات تک محدود رکھنے کے بجائے ایسی تعلیم اور تربیت فراہم کرنا ضروری ہے جس کے ذریعے وہ بین الاقوامی سطح پر بھی اپنی صلاحیتوں کا لوہا منوا سکیں۔ انہوں نے کہا کہ انجینئرنگ اور سول انجینئرنگ کا شعبہ کسی بھی ملک کی معاشی اور بنیادی ترقی میں کلیدی کردار ادا کرتا ہے۔ سڑکوں، پلوں، عمارتوں، آبی وسائل، نکاسی آب، شہری منصوبہ بندی اور جدید انفرااسٹرکچر کی تعمیر میں انجینئرز کی مہارت ناگزیر ہے، جبکہ موسمیاتی تبدیلیوں، شہری آبادی میں اضافے، پانی کی قلت اور قدرتی آفات جیسے چیلنجز سے نمٹنے کے لیے جدید سائنسی تحقیق اور پائیدار انجینئرنگ حل وقت کی اہم ضرورت ہیں۔ ناصر حسین شاہ نے کہا کہ پاکستان کو درپیش بنیادی ڈھانچے کے مسائل کا حل روایتی طریقہ کار کے بجائے جدید تحقیق، سائنسی بنیادوں پر منصوبہ بندی اور جدید ٹیکنالوجی کے مؤثر استعمال میں پوشیدہ ہے۔ جامعات اور تحقیقی اداروں کو چاہیے کہ وہ اپنے تحقیقی کام کو عملی ضروریات سے منسلک کریں تاکہ ان کے نتائج عام شہریوں کی زندگی بہتر بنانے اور قومی ترقی میں براہ راست معاون ثابت ہوں۔ انہوں نے کہا کہ بین الاقوامی کانفرنسز کے انعقاد سے نہ صرف مقامی اور عالمی ماہرین کو ایک دوسرے کے تجربات سے استفادہ کرنے کا موقع ملتا ہے بلکہ تحقیق، علمی تبادلے اور مشترکہ منصوبوں کے نئے راستے بھی کھلتے ہیں۔ ایسی کانفرنسز پاکستان کے انجینئرنگ شعبے کو عالمی معیار سے ہم آہنگ کرنے اور جدید سائنسی رجحانات سے فائدہ اٹھانے میں اہم کردار ادا کرتی ہیں۔ وزیر بلدیات نے کہا کہ شہید محترمہ بے نظیر بھٹو کا تعلیمی وژن بھی ہمارے لیے رہنمائی کا ذریعہ ہے۔ انہوں نے اعلیٰ تعلیم، سائنسی ترقی، خواتین کی تعلیم اور نوجوانوں کو بااختیار بنانے پر خصوصی توجہ دی۔ آج بھی پاکستان پیپلز پارٹی کی قیادت تعلیم، جدید ٹیکنالوجی اور نوجوانوں کی ترقی کو قومی ترجیحات میں اہم مقام دیتی ہے۔ چیئرمین پاکستان پیپلز پارٹی بلاول بھٹو زرداری کی جانب سے تعلیم، جدید ٹیکنالوجی اور نوجوان نسل کی ترقی کے حوالے سے دی جانے والی ہدایات خصوصی اہمیت رکھتی ہیں۔ بلاول بھٹو زرداری کا وژن ہے کہ نوجوانوں کو مستقبل کے تقاضوں کے مطابق جدید علوم اور مہارتوں سے آراستہ کیا جائے تاکہ وہ ملک کی ترقی میں مؤثر کردار ادا کرنے کے ساتھ عالمی سطح پر بھی پاکستان کی نمائندگی کر سکیں۔ ناصر حسین شاہ نے امید ظاہر کی کہ 16ویں بین الاقوامی سول انجینئرنگ کانفرنس بامعنی علمی مباحثوں، جدید تحقیقی نتائج اور مؤثر تجاویز کو فروغ دے گی۔ انہوں نے کہا کہ اس نوعیت کی کانفرنسز کا تسلسل سے انعقاد پاکستان کو درپیش انجینئرنگ اور بنیادی ڈھانچے کے مسائل کے حل کے لیے جدید، قابل عمل اور دیرپا تجاویز سامنے لانے میں مددگار ثابت ہوگا۔ انہوں نے این ای ڈی یونیورسٹی کی انتظامیہ، منتظمین، اساتذہ، محققین اور کانفرنس میں شریک ملکی و غیر ملکی ماہرین کی کاوشوں کو سراہتے ہوئے کہا کہ تعلیمی اداروں، حکومت اور نجی شعبے کے درمیان مضبوط اشتراک ہی علم کو عملی ترقی میں تبدیل کرنے کا مؤثر ذریعہ ہے۔
بین الاقوامی سول انجینئرنگ کانفرنس بامعنی علمی مباحثوں، جدید تحقیقی نتائج اور مؤثر تجاویز کو فروغ دے گی،وزیر بلدیات سندھ
