وزیر اعلیٰ سندھ کے معاون خصوصی وسندھ ٹیکنیکل ایجوکیشن اینڈ ووکیشنل ٹریننگ اتھارٹی (اسٹیوٹا) کے چیئرمین جنید بلند کی صدارت میں کورنگی ایسوسی ایشن آف ٹریڈ اینڈ انڈسٹریز (کاٹی) میں ایک اہم اجلاس منعقد ہوا۔ اجلاس میں کاٹی کے صدر جنید نقی سمیت مختلف صنعتوں کے نمائندوں نے شرکت کی۔اجلاس کے دوران صنعتکاروں نے ہنر مند افرادی قوت کی قلت اور تکنیکی تعلیم کو صنعتوں کی ضروریات کے مطابق ڈھالنے پر زور دیا۔ کاٹی کے نمائندوں نے اسٹیوٹا کے ساتھ پبلک پرائیویٹ پارٹنرشپ کے تحت تعاون بڑھانے کا عزم ظاہر کیا۔اس موقع پر چیئرمین اسٹیوٹا جنید بلند نے کہا کہ حکومت صنعتکاروں سے جڑی ہے، اور ان تعلقات کو مزید بہتر بنانے کی ضرورت ہے تاکہ نوجوانوں کو جدید صنعتوں میں مواقع فراہم کیے جا سکیں۔ ان کا کہنا تھا کہ مینوفیکچرنگ، انجینئرنگ اور آئی ٹی سمیت مختلف شعبوں میں ہنر مند افرادی قوت کی کمی کو پورا کیا جائے گا۔انہوں نے مزید کہا کہ چیئرمین پیپلز پارٹی بلاول بھٹو زرداری کی ہدایات کے مطابق اسٹیوٹا کے تربیتی کورسز کو صنعتوں کی بدلتی ہوئی ضروریات کے مطابق ڈھالا جائے گا، تاکہ نوجوانوں کو عملی میدان میں بہتر مواقع میسر آسکیں۔ جنید بلند نے اس بات پر بھی زور دیا کہ نوجوانوں کو ووکیشنل ٹریننگ فراہم کرنا محترمہ بینظیر بھٹو شہید کا وژن تھا، جسے بلاول بھٹو زرداری آگے بڑھا رہے ہیں۔ پی پی پی کا منشور ہے کہ ملک کا ہر شہری تربیت یافتہ ہو تاکہ وہ ملک کی ترقی میں اپنا کردار ادا کر سکیں۔ پی پی پی چیئرمین بلاول بھٹو زرداری کی ہدایات پر اسٹیوٹا کے تمام انسٹیٹیوٹز کے دورے شروع کیے ہیں، آنے والے وقت میں عوام کو ان میں بہتری نظر آئے گی۔اجلاس میں اسٹیوٹا اور کاٹی کے درمیان تعاون پر اتفاق کیا گیا، اور پبلک پرائیویٹ پارٹنرشپ کے تحت تربیتی مراکز قائم کرنے کی تجویز پر غور کیا گیا۔ صدر کاٹی جنید نقی نے چیئرمین اسٹیوٹا کو تفصیلی بریفنگ دی اور آخر میں انہیں یادگاری شیلڈ بھی پیش کی۔
چیئرمین اسٹیوٹا جنید بلند کی صدارت میں کاٹی میں اہم اجلاس، صنعتوں کی ضروریات اور تربیتی پروگرامز پر تبادلہ خیال
