حکومت سندھ کے سروسز، جنرل ایڈمنسٹریشن اینڈ کوآرڈینیشن ڈیپارٹمنٹ نے بلدیاتی اداروں میں عوامی خدمات کی فراہمی کو مزید مؤثر بنانے اور مقامی سطح پر بہتری لانے کے لیے ایک اعلیٰ سطحی کمیٹی تشکیل دینے کا نوٹیفکیشن جاری کر دیا ہے۔ یہ نوٹیفکیشن 8 اپریل 2026 کو کراچی میں جاری کیا گیا۔جاری کردہ اعلامیے کے مطابق کمیٹی کے چیئرمین وزیر بلدیات و ہاؤسنگ، ٹاؤن پلاننگ ہوں گے جبکہ سیکریٹری بلدیات کو کمیٹی کاسیکریٹری مقرر کیا گیا ہے۔ اس کے علاوہ وزیر اعلیٰ کے انسپیکشن، انکوائریز اینڈ امپلیمنٹیشن ٹیم (CMIEIT) کے چیئرمین، لوکل گورنمنٹ کمیشن کے نامزد نمائندے، اور چیئرمین کی جانب سے نامزد دیگر اراکین بھی کمیٹی کا حصہ ہوں گے۔کمیٹی کے قیام کا مقصد مقامی سطح پر عوامی خدمات کی فراہمی کے نظام کو مزید بہتر بنانا ، خاص طور پر یونین کونسل سطح تک موجودہ سروس ڈیلیوری کے طریقہ کار کا جائزہ لینا، ترقیاتی کاموں کے معیار اور رفتار کو بہتر بنانا، مالیاتی نظم و ضبط کو یقینی بنانا، اور انسانی وسائل کے مؤثر استعمال کو فروغ دینا شامل ہے۔کمیٹی بلدیاتی کاؤنسلز کے متعلق وصول ہونے والی مالی اور انتظامی شکایات، فنڈز کے غلط استمعال، غیر قانونی بھرتیوں، آمدنی میں بےظابطگیوں کا بھی جائزہ لے گی۔مزید برآں، کمیٹی کو ہدایت دی گئی ہے کہ وہ تین ماہ کے اندر اپنی حتمی رپورٹ پیش کرے جبکہ ہر ماہ عبوری پیش رفت رپورٹ بھی وزیر اعلیٰ سندھ کے دفتر کو ارسال کرے گی۔نوٹیفکیشن کے مطابق، سیکریٹری بلدیات کمیٹی کے اجلاسوں کے انعقاد، منٹس کی تیاری اور سرکاری ریکارڈ کی دیکھ بھال کے لیے سیکریٹریل معاونت فراہم کریں گے۔
سندھ کے بلدیاتی اداروں میں عوامی خدمات کی فراہمی کو مزید مؤثر بنانے،مقامی سطح پر بہتری لانے کیلئے اعلیٰ سطحی کمیٹی تشکیل،نوٹیفکیشن
