سندھ کے وزیراعلیٰ سید مراد علی شاہ نے نیو سیکریٹریٹ میں سندھ سیکریٹریٹ ایمپلائز نان گزٹیڈ ویلفیئر ایسوسی ایشن (سینوا) کے نومنتخب عہدیداران سے حلف لیا۔
سیکریٹریٹ پہنچنے پر وزیراعلیٰ سندھ کا استقبال چیف سیکریٹری آصف حیدر شاہ، سیکریٹری جنرل ایڈمنسٹریشن محمد علی کھوسو، سیکریٹری غلام نبی بُرڑو اور ایس این ای ڈبلیو اے کے عہدیداران نے کیا۔تقریب کا آغاز قاری محمد وحید قادری کی تلاوتِ کلامِ پاک سے ہوا، جس کے بعد حضور نبی کریم ﷺ کے اعزاز میں روح پرور محفلِ میلاد منعقد کی گئی۔اس موقع پر رکن قومی اسمبلی نبیل گبول، سندھ حکومت کی ترجمان سنیتا افضل، مذہبی اسکالر علامہ حافظ غلام محمد سوھو، معروف نعت خواں اور دیگر معزز مہمانوں نے شرکت کی۔تقریب کے دوران وزیراعلیٰ مراد علی شاہ نے سینوا کے نومنتخب عہدیداران سے حلف لیا، جن میں صدر معشوق منگڑیجو، جنرل سیکریٹری گل حمید بلوچ، سینئر نائب صدر فیصل میمن، نائب صدر بلاول جونیجو اور فنانس سیکریٹری مخدوم ولی محمد شامل ہیں۔اس موقع پر سینوا کے صدر معشوق منگڑیجو نے وزیراعلیٰ کو اجرک پیش کی جبکہ جنرل سیکریٹری گل حمید بلوچ نے انہیں سندھی ٹوپی پہنائی۔ نائب صدر بلاول جونیجو نے چیف سیکریٹری آصف حیدر شاہ کو بھی اجرک اور ٹوپی پیش کی۔وزیراعلیٰ سید مراد علی شاہ نے اپنے خطاب میں سینوا کو نبی اکرم ﷺ کے اعزاز میں روحانی محفل سجانے پر مبارکباد دی۔انہوں نے کہا کہ میں سینوا کو مبارکباد پیش کرتا ہوں کہ انہوں نے حضور نبی کریم ﷺ کی مدح میں یہ روحانی محفل سجائی۔ اللہ تعالیٰ ہم سب پر اور ہماری پیاری سرزمین سندھ پر اپنی رحمتیں نازل فرمائے۔وزیراعلیٰ نے کہا کہ حکومت اپنے ملازمین کو قدر کی نگاہ سے دیکھتی ہے اور ان کی خدمات اور لگن کی تعریف کرتی ہے۔ پ سب ہمارے لیے نہایت اہم ہیں، اور میں آپ سب کا تہہِ دل سے شکر گزار ہوں۔
