وزیر اعلیٰ سندھ سید مراد علی شاہ کی زیر صدارت اجلاس میں عید میلاد النبی ﷺ (12 ربیع الاول) کے موقع پر سکیورٹی، صفائی اور بجلی کی فراہمی کے انتظامات کو حتمی شکل دی گئی۔اجلاس وزیر اعلیٰ ہاؤس میں منعقد ہوا
جس میں صوبائی وزراء شرجیل انعام میمن، سید ناصر حسین شاہ، سعید غنی، ضیاء الحسن لنجار، ریاض شاہ شیرازی، سینیٹر وقار مہدی اور میئر کراچی بیرسٹر مرتضیٰ وہاب شریک ہوئے۔ چیف سیکریٹری آصف حیدر شاہ، انسپکٹر جنرل پولیس غلام نبی میمن، سیکریٹری داخلہ اقبال میمن، کمشنر کراچی حسن نقوی، کراچی واٹر اینڈ سیوریج کارپوریشن اور کےالیکٹرک کے نمائندے بھی شریک تھے۔ اجلاس میں ویڈیو لنک کے ذریعے تمام ڈویژنل کمشنرز اور ڈپٹی انسپکٹر جنرلز نے بھی شرکت کی۔ اس موقع پر حاجی حنیف طیب، مفتی نذیر جان، ڈاکٹر صاحبزادہ فرید الدین قادری، ثروت اعجاز قادری، مولانا محمد اکبر درس، مولانا قاضی احمد نورانی، علامہ ڈاکٹر جمیل راٹھوڑ، مفتی محمد قاسم، علامہ اشرف گورمانی سمیت بڑی تعداد میں علمائے کرام بھی شریک ہوئے۔اجلاس کے آغاز پر وزیر اعلیٰ نے شرکاء کو ماہ ربیع الاول کی آمد پر مبارکباد دی۔ انہوں نے کہا کہ حضور اکرم حضرت محمد مصطفیٰ ﷺ کی 1500 ویں ولادت باسعادت عقیدت و احترام کے ساتھ منائی جائے گی۔ انہوں نے کہا کہ حضور ﷺ کی ولادت تمام انسانیت کے لیے رحمت اور شفقت کا پیغام ہے۔وزیر اعلیٰ نے انسپکٹر جنرل پولیس کو ہدایت کی کہ سندھ بھر میں ربیع الاول کے تمام پروگراموں اور جلوسوں کے لیے فول پروف سکیورٹی انتظامات یقینی بنائے جائیں۔مراد علی شاہ نے ڈویژنل کمشنرز کو ہدایت دی کہ تمام اضلاع میں صفائی ستھرائی کے مکمل انتظامات یقینی بنائے جائیں اور جہاں ضرورت ہو وہاں سڑکوں اور نکاسی آب کے نظام کی فوری مرمت کی جائے۔ انہوں نے کے الیکٹرک، حیسکو اور سیپکو پر زور دیا کہ وہ ڈویژن اور ضلعی انتظامیہ کے ساتھ مکمل رابطے میں رہتے ہوئے جشن کے دوران بلا تعطل بجلی فراہم کریں۔علمائے کرام نے عید میلاد النبی ﷺ کو مذہبی جوش و خروش اور پرامن ماحول میں منانے کے لیے مختلف تجاویز پیش کیں۔ وزیر اعلیٰ نے یقین دلایا کہ سکیورٹی، صفائی ستھرائی اور انتظامی رابطے سے متعلق ان کی تجاویز پر عمل درآمد کیا جائے گا۔ انہوں نے انتظامیہ کو ہدایت دی کہ وہ علمائے کرام کے ساتھ مسلسل رابطے میں رہ کر انتظامات کو سہل بنائے۔وزیر اعلیٰ نے زور دیا کہ عید میلاد النبی ﷺ شایانِ شان طریقے سے منائی جائے گی جو اتحاد، عقیدت اور احترام کی عکاسی کرے گی۔
