وزیرِ اعلٰی پنجاب مریم نواز شریف کے وژن ستھرا پنجاب پر عملدرآمد یقینی بناتے ہوئے ایل ڈبلیو ایم سی کی جانب سے پی پی 174 میں ڈور ٹو ڈور ویسٹ کولیکشن کا افتتاح کر دیا گیا ہے۔اس سلسلے میں یوسی 54 میں گھر گھر سے کوڑا اٹھانے کی افتتاحی تقریب کا انعقاد کیا گیا،
جس میں صوبائی وزیر ہاؤسنگ اینڈ اربن ڈیویلپمنٹ بلال یاسین اور سی ای او ایل ڈبلیو ایم سی بابر صاحب دین نے بطور مہمان خصوصی شرکت کی۔تقریب کے شرکاء سے اپنے خطاب میں صوبائی وزیر ہاؤسنگ اینڈ اربن ڈیویلپمنٹ بلال یاسین کا کہنا تھا کہ پنجاب میں ہر سہولت عوام کی دہلیز پر پہنچانے کے وعدے پورے ہورہے ہیں۔مریم نواز نے شہریوں کی دہلیز تک سہولیات کی فراہمی کا ایک اور وعدہ پورا کردیا،مشکل حالات کے باوجود عوام کی آسانی اور سہولت کیلئے اقدامات اٹھائے جارہے ہیں۔صفائی اور صحت کے حوالے سے حکومت فلاحی منصوبوں پر خطیر رقم خرچ کر رہی ہے،ایک طرف دوائی دہلیز تک پہنچ رہی ہے تو دوسری طرف صفائی کا نظام بہترین ہورہا ہے۔ اس موقع پر سی ای او ایل ڈبلیو ایم سی بابر صاحب دین کا کہنا تھا کہ وزیر اعلیٰ پنجاب مریم نواز شریف کا ویژن ستھرا پنجاب کامیابی سے جاری ہے۔ شہر لاہور میں 50 سے زائد یونین کونسلز میں گھر گھر سے ویسٹ کولیکشن کا آغاز کیا جا چکا ہے۔ہر یونین کونسل میں 8 سے 10 لوڈر رکشے ویسٹ کولیکشن کیلئے تعینات کئے گئے ہیں۔ہر روز 2 نئی یونین کونسلز میں ڈور ٹو ڈور ویسٹ کولیکشن کا آغاز کیا جا رہا ہے۔ شہر لاہور کی 274 یونین کونسلز میں گھر گھر سے ویسٹ کولیکشن کیلئے پر عزم ہیں۔ مزید برآں بلال گنج، مین بازار پیر مکی، موسیٰ روڈ، شیش محل روڈ، موہنی روڈ، اور داتا دربار کے گرد و نواح میں گھر گھر سے ویسٹ کولیکشن کا آغاز کر دیا گیا ہے اورچوڑی محلہ، ٹیکسالی چوک، جمشید سٹریٹ، میں بھی ایل ڈبلیو ایم سی رکشہ ٹیموں نے ورکنگ شروع کر دی ہے۔
