کمشنر لاہور زید بن مقصود کی زیر صدارت ہارس اینڈ کیٹل شو انتظامات اور ٹریفک پلان جائزہ کے حوالے سے اجلاس منعقد ہوا۔ اجلاس میں ہارس اینڈ کیٹل شو پارکنگ انتظامات اور ٹریفک روانی پر پی ایچ اے و ٹریفک افسران نے بریفنگ دی۔ ایڈیشنل ڈی جی ذیشان رانجھا نے پی ایچ اے کے تحت ہارس اینڈ کیٹل شو پروگرامز انتظامات پر بریفنگ دیتے ہوئے کہا ہے کہ فورٹریس میں ہارس اینڈ کیٹل شو کی افتتاحی تقریب و اوپننگ 9 فروری کو ہوگی، ہارس اینڈ کیٹل کے تحت دیگر پروگرام گریٹر اقبال پارک، جیلانی و پولو گراونڈ اور باغ جناح میں ہونگے، نیزہ بازی اور تیر اندازی کے ایونٹس میں 10 سے زائد ممالک کی ٹیمیں حصہ لیں گی، فل ڈریس ریہرسل فورٹریس سٹیڈیم میں ہوگی اور انتظامات کو حتمی کیا جائیگا۔ ٹریفک پولیس افسران نے ٹریفک پلان بارے بریفنگ دیتے ہوئے کہا ہے کہ ٹریفک پولیس ہارس اینڈ کیٹل شو کے شیڈولز کو سامنے رکھتے ہوئے ٹریفک پلان مرتب کررہی ہے۔
کمشنر لاہور نے ضلعی انتظامیہ کو ہدایت دیتے ہوئے کہا ہے کہ فورٹریس میں ضلعی انتظامیہ کے تحت کنٹرول روم قائم کیا جائے، ہر ایونٹ کو سامنے رکھتے ہوئے میونسپل اور سکیورٹی انتظامات کو ترتیب دیا جائے، ٹریفک مینیجمنٹ و پارکنگ پلان واضح بنائیں، شہریوں کی آسانی کیلئے مشتہر بھی کریں۔
اجلاس میں ڈی سی لاہور سید موسی رضا، ڈی جی ایل ڈی اے طاہر فاروق، ایڈیشنل کمشنر عبدالسلام عارف، ایڈیشنل ڈی جی پی ایچ اے ذیشان رانجھا، ایس ایس پی سکیورٹی عبدلوہاب، سی ای او ایل ڈبلیو ایم سی بابر صاحبدین سمیت واسا، ریسکیو 1122، ٹریفک و دیگر محکموں کے افسران نے شرکت کی۔
