محمد سہیل خان آفریدی کی اپوزیشن لیڈر قومی اسمبلی محمود خان اچکزئی اور اپوزیشن لیڈر سینیٹ علامہ ناصر عباس سے ملاقات!

ملاقات میں صوبائی وزیرِ اطلاعات و سائنس و انفارمیشن ٹیکنالوجی شفیع جان، مشیرِ جیل خانہ جات افتخار اللہ جان، ترجمان تحریکِ تحفظِ آئین پاکستان حسین احمد یوسفزئی اور سابق وزیراعظم عمران خان کے لیگل کونسل خالد یوسف چوہدری بھی موجود تھے۔وزیراعلیٰ سہیل آفریدی نے دونوں قائدین کو پنجاب میں اسٹریٹ موومنٹ اور پنجاب حکومت کی جانب سے اختیار کیے گئے اقدامات کے حوالے سے تفصیلی بریفنگ دی۔اپوزیشن قائدین نے وزیراعلیٰ خیبرپختونخوا کی قیادت میں پنجاب میں پُرامن اسٹریٹ موومنٹ کو سراہا اور پنجاب حکومت کی جانب سے سیاسی کارکنوں اور جمہوری آوازوں کے خلاف کیے گئے اقدامات کی شدید مذمت کی۔ انہوں نے واضح کیا کہ سیاسی اختلاف کو دبانے کے لیے ریاستی طاقت کا استعمال جمہوری اقدار، آئینی آزادیوں اور سیاسی رواداری کے صریحاً منافی ہے۔ملاقات میں 27 ستمبر کے مارچ اور آئندہ کی سیاسی و جمہوری حکمتِ عملی پر بھی تفصیلی تبادلۂ خیال کیا گیا۔ اس موقع پر واضح کیا گیا کہ 27 ستمبر کا مارچ مکمل طور پر پُرامن، آئینی اور جمہوری ہوگا اور عوام اپنے آئینی و جمہوری حقوق کے حصول کے لیے سڑکوں پر نکلیں گے۔شرکاء نے اس عزم کا اظہار کیا کہ صوبوں کے آئینی حقوق پر کسی صورت سمجھوتہ نہیں کیا جائے گا۔ پاکستان میں آئین کی بالادستی، جمہوریت کے تحفظ اور عوام کے مینڈیٹ کے احترام کے لیے تمام جمہوری قوتوں کو متحد ہو کر جدوجہد کرنا ہوگی۔شرکاء نے اس بات پر بھی زور دیا کہ موجودہ حالات میں خاموشی یا مصلحت کے بجائے آئین اور جمہوری اصولوں کے دفاع کے لیے واضح اور مؤثر سیاسی کردار ادا کرنا ناگزیر ہے۔