وزیراعلیٰ سندھ سید مراد علی شاہ نے 2025ء کے لیے گندم کاشتکاروں کی معاونت کے پروگرام کے جائزہ اجلاس کی صدارت کرتے ہوئے کسانوں کو فوری معاونت فراہم کرنے کی ضرورت پر زور دیا اور اکاؤنٹس کی تیز تر فعالیت اور فنڈز کی منتقلی کی ہدایت کی۔وزیراعلیٰ نے سندھ بینک کو اکاؤنٹس کی تصدیق، فعال بنانے اور ادائیگیوں کے اجرا کے عمل کو تیز کرنے کی سخت ہدایت دیتے ہوئے کہا کہ ڈائی امونیم فاسفیٹ (ڈی اے پی) کھاد کی سبسڈی میں تاخیر کے باعث کئی کسان بوائی کا اہم وقت گنوا چکے ہیں۔یہ اجلاس وزیراعلیٰ ہاؤس میں منعقد ہوا جس میں وزیر زراعت سردار محمد بخش خان مہر، چیف سیکریٹری آصف حیدر شاہ، سیکریٹری برائے وزیراعلیٰ عبدالرحیم شیخ، سیکریٹری زراعت محمد زمان ناریجو، سندھ بینک کے صدر انور شیخ اور دیگر اہم حکام شریک تھے۔پروگرام کے تحت سندھ بھر میں ایک سے پچیس ایکڑ کے مالک 4,00,875 کسانوں نے فیلڈ افسران کی مدد سے رجسٹریشن کرائی ہے۔ ان میں سے 3,38,192 رجسٹریشنز منظور ہو چکی ہیں جو پروگرام کے وسیع اثرات کو ظاہر کرتی ہیں۔نومبر کے آخر تک اکاؤنٹس کھولنے اور فنڈز کی منتقلی کا عمل جاری تھا جبکہ دسیوں ہزار اکاؤنٹس کھولے جا چکے تھے۔ سندھ بینک کو اکاؤنٹس کی فعال کرنے میں تیزی لانے، فنڈز کی فوری منتقلی، حق داروں کو بروقت آگاہی، فراہمی کی باقاعدہ معلومات اور محکمہ زراعت کو روزانہ کی بنیاد پر ڈیٹا دینے کی ہدایت کی گئی۔پروگرام کو مزید موثر بنانے کے لیے بینکوں اور محکمہ زراعت کے درمیان روزانہ کی بنیاد پر ڈیٹا کا تبادلہ اب معمول کا حصہ بن گیا ہے۔ وزیراعلیٰ نے ایک ریئل ٹائم مانیٹرنگ ڈیش بورڈ کا بھی جائزہ لیا اور پروگرام پر بروقت عملدرآمد یقینی بنانے کے لیے ذاتی نگرانی کے عزم کا اظہار کیا۔سید مراد علی شاہ نے 2025ء کے سندھ گندم کاشتکار معاونت پروگرام کو ایک اہم منصوبہ قرار دیتے ہوئے صوبائی حکومت کے اس عزم کا اعادہ کیا کہ وہ اہم بوائی کے موسم میں کسانوں کو کھاد خریدنے میں مدد فراہم کرے گی۔ تمام متعلقہ حکام کو ہدایت کی گئی کہ وہ منصوبے کے مقاصد مقررہ وقت میں حاصل کرنے کے لیے توجہ مرکوز رکھیں اور بروقت پیش رفت رپورٹ جمع کرائیں۔
