کراچی ڈویژن کے صدر و صوبائی وزیر سعید غنی کی زیر صدارت پاکستان پیپلز پارٹی کے کراچی میں ٹاؤنز چیئرمینز کا اجلاس منعقد ہوا۔اجلاس میں پیپلز پارٹی کراچی ڈویژن کے جنرل سیکرٹری رؤف احمد ناگوری اور تمام ٹاؤنز کے چیئرمینز نے شرکت کی۔اجلاس میں صوبائی وزیر سعید غنی نے تمام ٹاؤنز کی کارکردگی کے حوالے سے تفصیلی بریفننگ لی اور انہیں درپیش مسائل سمیت دیگر امور پر تبادلہ خیال کیا۔تمام ٹاؤنز چیئرمینز اپنے اپنے ٹاؤنز میں عوامی فلاح کے کاموں کو مزید تیز کریں ۔ سعید غنی نے مزید کہا کہ پیپلز پارٹی کے منشور کے مطابق تمام ٹاؤنز عوام کو پانی، سیوریج سمیت تمام روزمرہ ضروریات کی فراہمی کو یقینی بنائیں۔اجلاس میں گٹر میں گر کر جاں بحق ہونے والے بچے پر شدید غم و رنج کا اظہار کیا گیا۔
اجلاس میں صوبائی وزیر و صدر کراچی ڈویژن سعید غنی نے تمام ٹاؤنز چیئرمینز کو ہدایات دی کہ وہ آئندہ اس قسم کا کوئی سانحہ رونما نہ ہو اس کے لیے وہ اپنے اپنے ٹاؤن میں اس بات کو یقینی بنائیں ۔اجلاس میں اس بات پر بھی زور دیا گیا کہ تمام ٹاؤنز چیئرمینز اپنے اپنے علاقوں میں مین ہولز کے ڈھکن کی دستیابی کو یقینی بنائیں اور ان کی چوری کے تدارک کے لیے اقدامات کریں۔اجلاس میں تمام ٹاؤنز چیئرمینز نے انہیں درپیش مسائل اور مشکلات سے صوبائی وزیر کو آگاہ کیا، جس پر صوبائی وزیر سعید غنی نے ان کے فوری حل کی یقین دہانی کروائی۔
