پنجاب پلاننگ اینڈ ڈویلپمنٹ بورڈ نے مالی سال 2024-25 کے صوبائی ڈویلپمنٹ ورکنگ پارٹی کے 61ویں اجلاس میں پبلک بلڈنگز اور ریجنل پلاننگ سیکٹرز کی 2 ترقیاتی سکیموں کے لیے مجموعی طور پر 13 ارب 92کروڑ 46لاکھ 25ہزار روپے کے فنڈز کی منظوری دی۔ اجلاس کی صدارت چیئرمین پلاننگ اینڈ ڈویلپمنٹ بورڈ بیرسٹر نبیل احمد اعوان نے کی۔
صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں ملتان اور بہاولپور میں جی او آر اور جنوبی پنجاب سیکرٹریٹ کی تعمیر (ترمیمی) کیلئے 4 ارب 72کروڑ 39لاکھ 25ہزار روپے اور پنجاب سوشیو اکنامک رجسٹری کے قیام کے سلسلہ میں پنجاب میں ڈور ٹو ڈور سماجی و اقتصادی سروے کیلئے 9 ارب 20کروڑ 7لاکھ روپے شامل ہیں۔
اجلاس میں صوبائی سیکرٹری پی اینڈ ڈی بورڈ ڈاکٹر آصف طفیل سمیت چیف اکانومسٹ محمد مسعود انور، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
