میئر کراچی بیرسٹر مرتضیٰ وہاب کے ڈیجیٹلائزیشن وژن کے تحت بلدیہ عظمیٰ کراچی نے راست نظام کے ذریعے مکمل ڈیجیٹل ادائیگیوں کا نظام متعارف کرانے کا فیصلہ کرلیا ہے جس کے تحت کے ایم سی پاکستان کا پہلا بلدیاتی ادارہ بن گیا ہے جو تمام ادائیگیاں ای ٹرانسفر کے ذریعے انجام دے گا،میئر کراچی نے کہا کہ نئے مالی سال جولائی 2026ء سے کے ایم سی کی تمام وینڈرز، ٹھیکیداروں اور دیگر منظور شدہ ادائیگیاں براہِ راست بینک اکاؤنٹس میں منتقل کی جائیں گی،ڈیجیٹل ادائیگیوں کا یہ نظام شفافیت، گڈ گورننس اور مالی نظم و ضبط کے فروغ میں اہم کردار ادا کرے گا،انہوں نے کہا کہ راست کے ذریعے ادائیگیوں سے فنڈز مستحقین اور وینڈرز تک محفوظ، تیز رفتار اور حقیقی وقت میں منتقل ہوں گے جبکہ کاغذی کارروائی، دستی مراحل اور روایتی ادائیگیوں میں ہونے والی تاخیر کا خاتمہ ممکن ہوگا،انہوں نے کہا کہ یہ اقدام محض ٹیکنالوجی کی اپ گریڈیشن نہیں بلکہ بلدیاتی مالیاتی نظام میں ایک انقلابی تبدیلی ہے جس سے مالیاتی نگرانی مزید مؤثر ہوگی، شفافیت میں اضافہ ہوگا اور اخراجات میں بھی کمی آئے گی،انہوں نے کہا کہ کے ایم سی سندھ کے اکاؤنٹنٹ جنرل کے منظور شدہ ادائیگی نظام کے مطابق کیش لیس مالیاتی ماڈل اختیار کرنے والا پہلا بلدیاتی ادارہ بن گیا ہے جو جدید مالیاتی نظام کے نفاذ کی جانب ایک اہم پیشرفت ہے،اس موقع پر مشیر مالیات کے ایم سی گلزار ابڑو نے منصوبے کی خصوصیات، نفاذی حکمتِ عملی اور ٹائم لائن پر تفصیلی بریفنگ دی۔
کے ایم سی میں ڈیجیٹل ادائیگیوں کا نیا نظام متعارف، راست کے ذریعے تمام ادائیگیاں براہِ راست بینک اکاؤنٹس میں منتقل ہونگی،مرتضیٰ وہاب
