وزیر بلدیات پنجاب ذیشان رفیق کی زیر صدارت سول سیکرٹریٹ میں ہونے والے ایک اجلاس کے دوران ستھرا پنجاب پروگرام کے تحت شہریوں کی شکایات کے ازالے کا جائزہ لیا گیا۔ ایڈیشنل سیکرٹری لوکل گورنمنٹ ماریہ طارق اور تمام ویسٹ مینجمنٹ کمپنیوں کے سی ای اوز نے بذریعہ ویڈیو لنک شرکت کی۔
وزیر بلدیات ذیشان رفیق نے شکایات پورٹل پر شہریوں کے رابطے پر اظہار اطمینان کرتے ہوئے کہا کہ وزیراعلی مریم نواز نے شہریوں کی شکایات کے ازالے کا موثر میکانزم بنانے کی ہدایت کی ہے۔ وزیراعلی کی ہدایات پر عملدرآمد یقینی بنایا جائے گا۔ صوبائی وزیر نے خبردار کیا کہ صفائی کے مقرر کردہ اہداف پر سستی اور غفلت کی کوئی گنجائش نہیں۔ موصولہ شکایات پر فوری ایکشن لے کر تفصیل پورٹل پر اپ لوڈ کی جائیں۔ ذیشان رفیق نے ہدایت کی کہ ویسٹ مینجمنٹ کمپنیوں کے سی ای اوز اپنے دفاتر سے باہر نکلیں۔ خصوصی ٹیمیں اپنے علاقے میں ہاٹ سپاٹس کے باقاعدگی سے دورے کریں۔ کنٹریکٹرز کی کارکردگی کی مانیٹرنگ کی جائے۔ وزیر بلدیات نے یہ ہدایت بھی کی کہ یونین کونسل کی سطح پر کنٹریکٹرز کی مانیٹرنگ کے لئے سپروائزر مقرر کئے جائیں۔ ‘ستھرا پنجاب” وزیراعلی کا بہت بڑا عوام دوست منصوبہ ہے۔ مطلوبہ اہداف کے حصول کے لئے مقامی منتخب نمائندوں اور شہری حلقوں کا تعاون لازمی حاصل کیا جائے۔ ذیشان رفیق نے کہا کہ فیلڈ سٹاف کی حاضری اور ڈیش بورڈ پر ڈیٹا اینٹری کو یقینی بنایا جائے۔ مشینری کی دستیابی کے مسائل سیکرٹری کے نوٹس میں لائے جائیں تاکہ ان پر کارروائی کی جا سکے۔ صوبائی وزیر نے کہا کہ وہ خود بھی صوبے کے مختلف علاقوں کے دورے کر کے صورتحال کا جائزہ لیں گے۔
