میئر لاڑکانہ ایڈووکیٹ انور علی لہر کی صدارت میں میونسپل کارپوریشن لاڑکانہ کا ماہانہ عام رواجی اجلاس

میئر لاڑکانہ ایڈووکیٹ انور علی لہر کی صدارت میں میونسپل کارپوریشن لاڑکانہ کا ماہانہ عام رواجی اجلاس آفس کے کانفرنس ہال میں منعقد ہوا، جس میں اراکین کی بڑی تعداد نے شرکت کی۔اجلاس کے دوران اراکین نے شہر میں ترقی، صفائی اور عوامی سہولیات میں اضافے کے لیے متعدد اہم تجاویز اور منصوبے پیش کیے۔ جن میں شہر کی اہم سڑکوں اور چوراہوں پر سولر لائٹس کی تنصیب، سیکیورٹی کے لیے جدید کیمرے لگانا، مستحق خواتین کو سلائی مشینیں فراہم کرنا،اقلیتی عبادتگاہوں کو سہولیات فراہم کرنے، ٹرانسجینڈر برادری کو لیپ ٹاپ کی فراہمی، تجاوزات کے خلاف کارروائی تیز کرنا، اسپورٹس فیسٹیول کا انعقاد، او پی ایف روڈ پر گرین بیلٹ کو فعال بنانا، شہر میں ہیوی ٹریفک کے داخلے پر پابندی، ایمپائر روڈ پر اسپیڈ بریکر تعمیر کرنا،شاھ بہارو قبرستان سے تجاوزات کا خاتمہ، پلازہ اور سینٹرز میں مناسب پارکنگ ایریاز قائم کرنا، اور نکاسی آب کے نظام میں بہتری کے لیے پبلک ہیلتھ اور میونسپل کے باہمی منصوبہ بندی کرنا شامل ہیں۔اراکین نے یہ بھی تجویز دی کہ سیپکو کو پابند کیا جائے کہ وہ بجلی کی مسلسل فراہمی یقینی بنائے تاکہ رات کے وقت شہر میں اندھیرا نہ ہو روڈس پر لائٹس باقاعدگی سے چل سکیں۔میئر لاڑکانہ ایڈووکیٹ انور علی لہر نے اراکین کی جانب سے پیش کردہ تجاویز کو سراہتے ہوئے کہا کہ میونسپل کارپوریشن شہری سہولیات کی بہتری، جدید نظام اور شہر کی خوبصورتی کے لیے ہر ممکن اقدامات کرے گی۔ انہوں نے مزید کہا کہ لاڑکانہ کی ترقی اور صفائی ہم سب کی مشترکہ ذمہ داری ہے جس کے لیے سب کو مل کر کام کرنا ہوگا۔میئر لاڑکانہ کی جانب سے ہدایات کی گئی کہ پیش کردہ منصوبوں پر عمل درآمد کے لیے متعلقہ محکموں کو فوری طور پر احکامات جاری کیے جائیں اور آئندہ اجلاس میں ان پر پیش رفت رپورٹ پیش کی جائے۔