ڈپٹی کمشنر لاہور سید موسیٰ رضا کی سربراہی میں ضلعی انتظامیہ نے عید الاضحیٰ کے موقع پر شہریوں کو بہترین سہولیات فراہم کرنے کے لیے جامع تیاریاں مکمل کر لی ہیں۔ لاہور میں مویشیوں کی خرید و فروخت کے لیے پانچ مقامات پر منظم منڈیاں قائم کی جا رہی ہیں، جو 28 مئی سے عید الاضحیٰ تک فعال رہیں گی۔ انتظامیہ کا مقصد سنت ابراہیمی کی ادائیگی کو آسان بنانا اور شہریوں کو صاف ستھرے، محفوظ اور سہولت سے بھرپور ماحول فراہم کرنا ہے۔ اس سلسلے میں تمام متعلقہ اداروں کے ساتھ مل کر ایک مربوط حکمت عملی اپنائی گئی ہے،
جو شہریوں کی سہولت کو اولین ترجیح دیتی ہے۔ واہگہ سپورٹس کمپلیکس، نشتر ایل ڈی اے سٹی، راوی موازہ نین سکھ، برکی روڈ اور رائیونڈ میں مویشی منڈیاں قائم کی جائیں گی، جبکہ شاہ پور کانجراں کی مستقل منڈی بھی مکمل طور پر فعل رہے گی۔ پنجاب کیٹل مارکیٹ مینجمنٹ کمپنی کو خیموں، چارے، بیت الخلاء، بجلی، جنریٹرز اور صاف پانی کی فراہمی سمیت تمام ضروری سہولیات کے انتظام کی ذمہ داری سونپی گئی ہے۔ منڈیوں میں موبائل اے ٹی ایم، شکایتی سیل اور معلوماتی ڈیسک بھی قائم کیے جائیں گے تاکہ شہریوں کو کسی قسم کی پریشانی کا سامنا نہ کرنا پڑے ایف ڈبلیو او نے منڈیوں کی تعمیر مکمل کر لی ہے، جبکہ انتظامات کی نگرانی پنجاب کیٹل کمپنی کرے گی۔ سیکیورٹی اور ٹریفک کے انتظامات کو بھی خصوصی توجہ دی گئی ہے۔ پنجاب پولیس کو منڈیوں میں پرامن ماحول یقینی بنانے کی ہدایت کی گئی ہے، جبکہ ٹریفک وارڈنز منڈیوں کے آس پاس ٹریفک کی روانی کو برقرار رکھیں گے۔ لاہور ویسٹ مینجمنٹ کمپنی (ایل ڈبلیو ایم سی) کو سگیاں سائٹ سے ملبہ ہٹانے اور منڈیوں کی صفائی کی ذمہ داری سونپی گئی ہے۔ میٹروپولیٹن کارپوریشن لاہور غیر قانونی مویشی منڈیوں اور تجاوزات کے خاتمے کے لیے سرگرم ہے، اور اس سلسلے میں ایک خصوصی آپریشن بھی جاری ہے شہریوں سے گزارش کی گئی ہے کہ وہ غیر قانونی منڈیوں کی اطلاع ڈپٹی کمشنر کنٹرول روم (03070002345) یا سوشل میڈیا کے ذریعے دیں۔ ڈپٹی کمشنر سید موسیٰ رضا نے کہا کہ شہریوں کی سہولت اور حفاظت ان کی اولین ترجیح ہے۔ انہوں نے تمام متعلقہ اداروں کو ہدایت کی کہ وہ منڈیوں میں بہترین انتظامات کو یقینی بنائیں۔ اجلاس میں ایڈیشنل ڈپٹی کمشنر جنرل، تمام اسسٹنٹ کمشنرز، پنجاب پولیس، ٹریفک پولیس، ایل ڈبلیو ایم سی، واسا اور دیگر اداروں کے نمائندگان نے شرکت کی اور انتظامات کا جائزہ لیا یہ تیاریاں لاہور کے شہریوں کے لیے عید الاضحیٰ کو آسان اور پرامن بنانے کی طرف ایک اہم قدم ہیں۔ ضلعی انتظامیہ کی مربوط کوششوں سے نہ صرف شہریوں کو سہولت ملے گی بلکہ شہر میں نظم و ضبط اور صفائی کی صورتحال بھی بہتر ہوگی۔ انتظامیہ کا عزم ہے کہ وہ شہریوں کے تعاون سے اس مشن کو کامیابی سے مکمل کرے گی۔
