سی ای او بابر صاحب دین کی ہدایت پر لاہور میں متوقع بارشوں کے پیش نظر ایل ڈبلیو ایم سی کی آپریشن ٹیموں کو فیلڈ میں متحرک کر دیا گیا ہے۔شہر میں موجود تمام ہاٹ سپاٹ ایریاز کی کلیئرنس کا عمل یقینی بنانے کے لیے عملہ تعینات ہے جبکہ تمام عارضی کولیکشن پوائنٹس کو روزانہ کی بنیاد پر 100 فیصد کلیئر کرنے کی ہدایت بھی جاری کر دی گئی ہے۔
بارش کے پانی کی بہتر نکاسی کیلئے سڑک کے کناروں پر جمی مٹی کو فوری ہٹانے کے احکامات بھی صادر کر دئیے گئے ہیں۔بہترین صفائی اقدامات کے تحت نشتر ٹاؤن، مین فیروزپور روڈ، راوی ٹاؤن، شاہدرہ ٹاؤن میں خصوصی صفائی ٹیمیں فرائض کی ادائیگی کے لیے موجود ہیں۔علامہ اقبال ٹاؤن، ٹھوکر، اڈا پلاٹ، رائیونڈ کی دیہی یونین کونسلز میں خصوصی صفائی آپریشن جاری ہے۔مزید برآں متوقع بارش سے قبل تمام کمرشل مارکیٹس اور کنٹینرز 100 فیصد کلیئر کرنے کے لیے ایل ڈبلیو ایم سی آپریشن ٹیموں کو الرٹ کر دیا گیا ہے۔ سی ای او بابر صاحب دین کا اس حوالے سے کہنا ہے کہ موسمی صورتحال کے مدنظرافسران خود فیلڈ میں موجود رہ کر عملے کی 100 فیصد حاضری یقینی بنارہے ہیں۔ لاہوریوں کو صاف ستھرے اور خوشگوار ماحول کی فراہمی اولین ترجیح ہے۔ اس مقصد کے حصول کے لیے تمام وسائل بروئے کار لائے جا رہے ہیں۔شہریوں سے بھی گزارش ہے کہ بارش کے دوران صفائی عملے سے تعاون کریں، گلی محلوں میں کوڑا پھینکنے سے گریز کریں۔صفائی سے متعلق شکایات کے ازالے اور تجاویز کے لیے ایل ڈبلیو ایم سی کی ہیلپ لائن 1139پر رابطہ کریں یا سوشل میڈیاکا استعمال کریں۔
