حکومت پنجاب کے وژن ستھرا پنجاب کے پیش نظر ایل ڈبلیو ایم سی آپریشن ٹیمیں شہر میں موسلادھار بارش میں بھی شاہراؤں سے بارشی پانی کے نکاس کے لیے متحرک رہیں۔ سی ای او ایل ڈبلیو ایم سی بابر صاحب دین کی ہدایت پرایل ڈبلیو ایم سی کا عملہ شہر کے تمام چوکنگ پوائنٹس پر صفائی آپریشن پر مامور رہا۔سی ای او بابر صاحب دین کا اس حوالے سے کہنا ہےکہ دورانِ بارش صفائی آپریشن کے ساتھ ساتھ شہر میں نکاسی آب کو بھی یقینی بنایا گیا۔
ایل ڈبلیو ایم سی کے6000 سے زائد ویسٹ کنٹینرز معمول کے مطابق کلیئر کیے گئے جبکہ بارشی پانی کو رواں رکھنے کیلئے شاہراہوں سے شاپنگ بیگ، اور ریپرز ہٹانے پر ورکرز تعینات کیے گئے۔سرکلر روڈ، فورٹ روڈ، اعظم کلاتھ مارکیٹ، آزادی چوک پر صفائی ٹیمیں متحرک رہیں۔نور جہاں روڈ، لبرٹی مارکیٹ ، مین بلیوارڈ گلبرگ، ایم ایم عالم روڈ پر کلیئرنس کا عمل جاری رہا جبکہ شادمان مارکیٹ ، ایوان تجارت، بیڈن روڈ بازار، ٹیمپل روڈ پر صفائی آپریشن کر کے بارشی پانی کا نکاس کیا گیا۔مال روڈ، جیل روڈ، الحمرا، گورنر ہاؤس اور ملحقہ سڑکوں پر بھی صفائی ستھرائی یقینی بنائی گئی۔ تمام ٹاؤن مینجرز کوفیلڈ میں ورکرز کی 100 فیصد حاضری یقینی بنانے کی ہدایت بھی کی گئی۔مزید برآں تمام ٹاؤنز میں چوکنگ پوائنٹس پر عملہ تعینات رہا۔ نکاسی آب کو رواں رکھنے کے لیے شہریوں کا کردار بھی اہمیت کا حامل ہے عوام سے گزارش ہے کہ صفائی عملے کا ساتھ دیں، کوڑا گلی کوچوں میں پھینکنے کی بجائے ایل ڈبلیو ایم سی کےعملے کے حوالے کریں۔ صفائی سے متعلق شکایات کے ازالے کے لیے ایل ڈبلیو ایم سی کی ہیلپ لائن 1139پر رابطہ کریں یا سوشل میڈیا کا استعمال کریں۔
