چیف سیکرٹری خیبرپختونخوا شہاب علی شاہ کی زیرصدارت گورننس امور پر ہفتہ وار جائزہ اجلاس منعقد ہوا جس میں تجاوزات کے خاتمے، اشیائے خورونوش کی قیمتوں میں استحکام، سیاحت کے فروغ، صوبائی دارالحکومت کی اپلفٹ اور مستقبل میں سیلاب سے بچاؤ کے لئے جاری اقدامات کا تفصیلی جائزہ لیا گیا۔اجلاس میں بتایا گیا کہ 30 جون سے اب تک تجاوزات کیخلاف آپریشن میں 207 بلڈنگز کو سیل کیا گیا ہے۔ 1048 کنال پر محیط غیر قانونی بلڈنگز کو گرایا گیا ہے۔ 1741 کنال پر قائم تجاوزات ہٹائی گئی ہیں۔ گزشتہ ہفتے کے دوران 20 کنال سے زائد احاطے پر تجاوزات ہٹائی گئی ہیں۔ مختلف محکموں کے 52،562 کنال انکروچڈ لینڈ کی نشاندہی کی گئی ہے۔ یہ ڈیٹا تمام ڈپٹی کمشنرز کے ساتھ شئیر کردیا گیا ہے جس پر ضلعی انتظامیہ محکموں کے فیلڈ افسران کے ساتھ مل کر کاروائی شروع کررہے ہیں۔چیف سیکرٹری خیبرپختونخوا شہاب علی شاہ نے کہا کہ تمام محکمے ان اراضیات کو بہتر استعمال میں لانے کے لئے اپنی پلاننگ مکمل کریں۔ ڈپٹی کمشنر پشاور نے بتایا کہ 38 کلومیٹر بڈھنی نالہ پر بنے غیر قانونی سات تعمیرات (60 مرلہ) اب تک گرائے گئے ہیں جس سے پانی کے بہاو میں خلل پڑتا تھا۔چیف سیکرٹری نے کہا کہ پشاور میں ہاؤسنگ سوسائٹیز کو لینڈ یوز پلان کے تحت ہی این او سیز جاری کی جائیں۔ جو اراضی لینڈ یوز پلان میں گرین لینڈ ہے وہاں پر تعمیرات کی اجازت نہ دی جائے۔ غیر قانونی ہاؤسنگ سوسائٹیز کا ڈیٹا اکٹھا کیا جائے تاکہ قانونی کاروائی عمل میں لائی جاسکے۔ اس حوالے سے تمام متعلقہ ادارے آپس میں ربط سے کام کریں۔
پبلک پرائیویٹ پارٹنرشپ کے تحت سرمایہ کاری کے لئے منصوبوں کی پچ بک، اور پی پی پی پراجیکٹ کی ٹریکنگ پر کام کیا جارہا ہے۔ پشاور ڈی آئی خان موٹروے، سوات موٹروے فیز ٹو، ٹھنڈیانی سیاحتی منصوبہ، درابن اکنامک زون، گنھول انٹیگریٹڈ ٹورازم زون پر پیش رفت جاری ہے۔سیکرٹری ایریگیشن نے آبی گذرگاہوں کی ڈی سلٹنگ صفائی کے بارے میں مختلف آپشنز پیش کئے اس حوالے سے جامع پلاننگ کی گئی ہے جس کی صوبائی کابینہ سے منظوری لی جائے گی۔چیف سیکرٹری نے گزشتہ روز نیو جنرل بس ٹرمینل پشاور کا دورہ کرکے اس پر جاری ترقیاتی کام کا جائزہ لیا تھا جبکہ محکمہ منصوبہ بندی و ترقی خیبرپختونخوا کو ایک ہزار ملین کا پی سی ون منظوری کیلئے بھیجا گیا ہے جس میں جی ٹی روڈ جمرود روڈ، رنگ روڈ کے روڈ فرنیچر بحالی شامل ہے۔ یہ اقدامات صوبائی دارالحکومت کی اپلفٹ کے تحت اٹھائے جا رہے ہیں۔محکمہ سیاحت نے گلیات میں بی این اے روڈ کی اپ لفٹ اور گلیات کیلئے سالڈ ویسٹ مینجمنٹ پلان صوبائی کابینہ منظوری کے لئے بھیج دیا ہے یہ اقدام سیاحت کے فروغ اور ماحولیاتی تحفظ کے لئے کیا جارہا ہے۔
