وزیر اعلیٰ پنجاب مریم نواز شریف کے ویژن کے تحت کم آمدنی والے طبقات کے لیے تاریخی رہائشی منصوبے کا آغاز کر دیا گیا ہے۔ پنجاب حکومت نے 57 ہزار معیاری اور کم لاگت رہائش گاہوں کی تعمیر کا عزم ظاہر کیا ہے جن میں شمسی توانائی، بارشی پانی ذخیرہ کرنے کے نظام اور بین الاقوامی معیار کی سہولیات فراہم کی جائیں گی۔ترجمان محکمہ ہاؤسنگ پنجاب کے مطابق یہ رہائش گاہیں محکمہ ہاؤسنگ پنجاب کے زیر انتظام تعمیر کی جائیں گی تاکہ شہریوں کو معیاری اور سستی رہائش فراہم کی جا سکے۔ پہلے مرحلے میں 20 ہزار رہائش گاہوں کی تعمیر کے لیے صوبہ بھر میں 41 سائٹس کا انتخاب مکمل کر لیا گیا ہے جبکہ منتخب سرکاری زمینوں کو پنجاب ہاؤسنگ اینڈ ٹاؤن پلاننگ ایجنسی کے نام منتقل کرنے کی منظوری دی جا چکی ہے۔صوبہ بھر کے 24 اضلاع میں سرکاری زمینوں پر رہائش گاہوں کی تعمیر کی جائے گی جو مستحق افراد کو آسان اقساط پر فراہم کی جائیں گی۔ پروگرام کے تحت 16 اضلاع میں 250 مربع فٹ پر مشتمل رہائش گاہوں کی تعمیر کے لیے 22 سائٹس، پانچ اضلاع میں 530 مربع فٹ کی تین منزلہ رہائش گاہوں کے لیے 11 سائٹس، جبکہ تین اضلاع میں 550 مربع فٹ پر محیط چار منزلہ رہائش گاہوں کے لیے آٹھ سائٹس کا انتخاب کیا گیا ہے۔
ترجمان کے مطابق منصوبہ آئندہ پانچ سال میں مکمل کیا جائے گا۔ رہائش گاہوں میں شمسی توانائی کا نظام مہیا کیا جائے گا اور بارشی پانی ذخیرہ کرنے کا نظام بھی متعارف کرایا جائے گا۔ تمام تعمیرات کے دوران معیار کی جانچ اور منصوبے کی نگرانی باقاعدگی سے یقینی بنائی جائے گی تاکہ کسی مرحلے پر معیار پر سمجھوتہ نہ ہو۔ترجمان کے مطابق رہائش گاہیں ورلڈ بینک اور پرائیویٹ سیکٹر کے اشتراک سے تعمیر کی جائیں گی، جبکہ رہائشیوں کو تمام بنیادی سہولیات کی فراہمی یقینی بنائی جائے گی۔ افورڈیبل ہاؤسنگ منصوبہ بہترین حکمت عملی کے تحت مکمل کیا جائے گا تاکہ وزیر اعلیٰ پنجاب کے عوام دوست ویژن کو عملی شکل دی جا سکے۔
