وزیر اعلیٰ پنجاب محترمہ مریم نواز شریف کی خصوصی ہدایات پر صوبہ بھر میں عیدالاضحیٰ کے موقع پر صفائی کے غیر معمولی اقدامات کیے گئے، جن کے نتیجے میں پہلے روز صفائی آپریشن کامیابی سے مکمل ہوا۔ محکمہ بلدیات کے مرکزی کنٹرول روم کی جانب سے جاری کردہ رپورٹ کے مطابق "ستھرا پنجاب پروگرام” کے تحت پہلے روز مجموعی طور پر ایک لاکھ دس ہزار ٹن آلائشیں محفوظ طریقے سے تلف کی گئیں۔
سیکرٹری بلدیات پنجاب، شکیل احمد میاں نے بتایا کہ اس سال صفائی آپریشن کو صرف شہری نہیں بلکہ دیہی علاقوں تک بھی وسعت دی گئی ہے تاکہ عید کے ایام میں صفائی ستھرائی کے اعلیٰ معیار کو ہر سطح پر یقینی بنایا جا سکے۔ اُن کا کہنا تھا کہ عید کے تینوں روز صفائی کا خصوصی آپریشن پوری قوت کے ساتھ جاری رہے گا۔رپورٹ کے مطابق لاہور ڈویژن سے 35 ہزار ٹن، بہاولپور سے 14 ہزار ٹن، فیصل آباد سے 12 ہزار ٹن، گوجرانوالہ سے 8 ہزار ٹن، ملتان سے 9 ہزار، راولپنڈی سے 8 ہزار اور سرگودھا سے 7 ہزار ٹن آلائشیں تلف کی گئیں۔ ساہیوال میں 4,406، سیالکوٹ میں 4,307 اور ڈیرہ غازی خان میں 5,936 ٹن آلائشیں ٹھکانے لگائی گئیں۔پہلے روز صوبہ بھر سے چھ ہزار سے زائد صفائی سے متعلق شکایات موصول ہوئیں، جن میں سے پانچ ہزار سے زائد شکایات کو فوری طور پر نمٹا دیا گیا۔ اس سال شہریوں میں ایک کروڑ سے زائد ماحول دوست ویسٹ بیگز مفت تقسیم کیے گئے تاکہ آلائشوں کو مناسب انداز میں جمع کر کے محفوظ طریقے سے ٹھکانے لگایا جا سکے۔
سیکرٹری بلدیات کے مطابق "ستھرا پنجاب” پروگرام کے تحت 100 فیصد مشینری اور گاڑیاں صفائی آپریشن میں استعمال کی جا رہی ہیں۔ عید کے تینوں روز مجموعی طور پر ایک لاکھ انتالیس ہزار سے زائد صفائی عملہ ڈیوٹی پر مامور ہے، جبکہ چھتیس ہزار سے زائد گاڑیاں آپریشن میں حصہ لے رہی ہیں۔ آلائشوں کی بروقت کلیکشن کے لیے تین ہزار سے زائد عارضی کلیکشن پوائنٹس قائم کیے گئے ہیں۔شکیل احمد میاں نے عوام سے اپیل کی ہے کہ وہ صفائی کے اس مشترکہ قومی فریضے میں حکومت کے ساتھ بھرپور تعاون جاری رکھیں اور آلائشیں مخصوص مقامات پر رکھ کر صفائی عملے سے قریبی رابطہ رکھیں، تاکہ عید کے بقیہ ایام بھی صاف، خوشگوار اور صحت مند ماحول میں گزر سکیں۔
