وزیراعلیٰ سندھ سید مراد علی شاہ نے کہا ہے کہ آزاد صحافت جمہوریت کی بنیاد ہے۔ آزاد میڈیا کے لیے محفوظ ماحول پیدا کرنا ریاست کی بنیادی ذمہ داری ہے۔ انہوں نے کہا کہ صحافیوں پر حملے سماج کے ضمیر پر وار ہیں۔ انہوں نے ’صحافیوں کے خلاف جرائم میں استثنیٰ کے خاتمے کے عالمی دن‘ پر اتوار کے دن وزیراعلیٰ ہاؤس سےجاری اپنے پیغام میں کہی۔ سید مراد علی شاہ نے کہا کہ پاکستان پیپلز پارٹی کی حکومت آزادی اظہار کے تحفظ کے لیے پرعزم ہے۔ سندھ پہلا صوبہ ہے جہاں صحافیوں کے تحفظ کے لیے جامع قانون نافذ کیا گیا ہے اور سندھ کمیشن فار پروٹیکشن آف جرنلسٹس عملی و مؤثر کردار ادا کر رہا ہے۔ وزیراعلیٰ سندھ نے کہا کہ صحافیوں کے تحفظ کے لیے ٹھوس اور مؤثر اقدامات کیے جا رہے ہیں۔ ڈیجیٹل دنیا میں صحافیوں کے تحفظ کے لیے نئی قانون سازی وقت کی اہم ضرورت ہے۔ انہوں نے کہا کہ آزادی صحافت کے بغیر کوئی معاشرہ مکمل نہیں ہو سکتا۔ صحافیوں پر حملوں میں ملوث عناصر کو ہرگز رعایت نہیں دی جائے گی۔ سید مراد علی شاہ نے مزید کہا کہ نفرت انگیز مہمات اور آن لائن ہراسانی کو روکنے کے لیے مربوط حکمتِ عملی تیار کی جا رہی ہے۔ انہوں نے زور دیا کہ آزاد، محفوظ اور بااعتماد میڈیا کے بغیر جمہوریت کا تصور نامکمل ہے۔
