سندھ میں ڈینگی اور مليريا کے بڑھتے ہوئے کیسز کے پیش نظر پروونشل ڈزاسٹر مینجمنٹ اتھارٹی (پی ڈی ایم اے) سندھ نے متاثرہ اضلاع کو امدادی سامان روانہ کر دیا ہے۔ ڈپٹی کمشنرز کی درخواست پر مختلف اضلاع میں ڈینگی اور مليريا سے بچاؤ کے لیے ضروری سامان کی فراہمی کا عمل جاری ہے۔ ترجمان پی ڈی ایم اے سندھ کے مطابق جامشورو کے ڈسٹرکٹ ڈیزاسٹر مینجمنٹ اتھارٹی (ڈی ڈی ایم اے) کو 6 ہزار مچھر دانیاں، 16 وہیل چیئرز اور 3 فوگنگ مشینز فراہم کی گئی ہیں۔ اسی طرح ٹنڈوالیار اور سانگھڑ کی ڈی ڈی ایم ایز کو 5، 5 ہزار مچھر دانیاں دی گئی ہیں تاکہ اضلاع میں ڈینگی اور مليريا سے بچاؤ کی مہم کو مؤثر بنایا جا سکے۔ ڈی جی پی ڈی ایم اے سندھ، سید سلمان شاہ نے بتایا کہ وزیرِاعلیٰ سندھ کے مشیرِ برائے بحالی، گیانچند ایسرانی کی ہدایات پر متاثرہ اضلاع کو فوری امدادی سامان فراہم کیا جا رہا ہے۔ انہوں نے کہا کہ پی ڈی ایم اے ڈینگی اور ملیریا کی صورتحال سے نمٹنے کے لیے متحرک ہے اور تمام ممکنہ وسائل بروئے کار لائے جا رہے ہیں۔ ڈی جی پی ڈی ایم اے نے عوام سے اپیل کی ہے کہ وہ ڈینگی اور ملیریا سے بچاؤ کے لیے احتیاطی تدابیر اختیار کریں، گھروں اور گلیوں میں پانی جمع نہ ہونے دیں، اور محکمہ صحت و ضلعی انتظامیہ کے ساتھ تعاون کریں تاکہ ڈینگی اور ملیریا کے پھیلاؤ پر قابو پایا جا سکے۔
ڈینگی اور مليريا کے بڑھتے کیسز کے پیش نظر پی ڈی ایم اے سندھ کی جانب سے امدادی سامان متاثرہ اضلاع کو روانہ
