وزیراعلیٰ پنجاب مریم نواز شریف کے زرعی انقلاب اور کسانوں کی خوشحالی کے وژن کو عملی جامہ پہناتے ہوئے، ڈپٹی کمشنر لاہور کیپٹن (ر) محمد علی اعجاز کی قیادت میں ضلعی انتظامیہ لاہور نے "پروگرام برائے واٹر ایفیشنٹ ایگریکلچر” کے تحت جدید زرعی آلات کی فراہمی کے لیے انتہائی شفاف اور کامیاب قرعہ اندازی کا انعقاد کیا ہے۔ ٹاؤن ہال لاہور میں منعقدہ اس پروقار تقریب میں ممبر قومی اسمبلی ملک سیف الملوک کھوکھر، ن لیگی رہنما خواجہ احمد حسان اور ضلعی انتظامیہ لاہور کے اعلیٰ افسران نے شرکت کی۔ ڈی سی لاہور کیپٹن (ر) محمد علی اعجاز کی خصوصی ہدایات پر اسسٹنٹ کمشنر وقاص انجم نے بیلٹنگ کے تمام مراحل کی خود نگرانی کی تاکہ میرٹ پر کوئی سمجھوتہ نہ ہو۔ اس پروگرام کے تحت لاہور کے لیے مختص 10 یونٹس کے حصول کے لیے 74 اہل امیدواروں کے درمیان قرعہ اندازی کی گئی، جس میں کامیاب ہونے والے کاشتکاروں کو فی یونٹ 6 لاکھ روپے کی خطیر سرکاری سبسڈی فراہم کی جائے گی۔ ایم این اے ملک سیف الملوک کھوکھر نے اس موقع پر گفتگو کرتے ہوئے کہا کہ پانی کی بچت اور فی ایکڑ پیداوار میں اضافے کے لیے لیزر لینڈ لیولرز کا استعمال ناگزیر ہے اور یہ اقدام کسان کو خوشحال اور ملکی معیشت کو مستحکم کرے گا۔ خواجہ احمد حسان نے اسے حکومت پنجاب کا کسانوں کے لیے ایک بڑا تحفہ قرار دیتے ہوئے کہا کہ جدید ٹیکنالوجی کی منصفانہ تقسیم کو یقینی بنانے کے لیے قرعہ اندازی کے عمل کو مکمل طور پر ڈیجیٹل اور شفاف رکھا گیا ہے۔ تقریب کے اختتام پر کامیاب امیدواروں میں الاٹمنٹ سلپس تقسیم کی گئیں جبکہ ویٹنگ لسٹ میں موجود امیدواروں کے ریکارڈ کو بھی محفوظ کر لیا گیا ہے تاکہ مستقبل میں ضرورت پڑنے پر انہیں ترجیح دی جا سکے۔ محکمہ زراعت کے افسران کو ہدایت کی گئی ہے کہ وہ کسانوں کو ان جدید آلات کے استعمال سے متعلق مکمل تکنیکی رہنمائی فراہم کریں تاکہ زراعت میں جدید کاری کا ہدف حاصل کیا جا سکے۔
