وزیراعلیٰ خیبر پختونخوا محمد سہیل آفریدی نے لوئر دیر، تیمرگرہ میں جلسے کے بعد خصوصی وڈیو پیغام کے ذریعے علاقے کے عوام اور نوجوانوں کے لیے اہم ترقیاتی منصوبوں کا اعلان کیا۔ پیغام میں انہوں نے سپاس نامہ پڑھنے سے رہ جانے پر معذرت بھی کی۔وزیراعلیٰ نے لوئر دیر کے نوجوانوں کے لیے جدید اسپورٹس کمپلیکس کے قیام اور تیمرگرہ ٹیچنگ ہسپتال میں ملٹی اسٹوری عمارت کی تعمیر کا اعلان کیا۔ انہوں نے کہا کہ سپاس نامہ میں پیش کیے گئے تمام مطالبات اور منصوبوں کا جائزہ لینے کے لیے ایک خصوصی ٹیم تشکیل دی جائے گی، جو ان کے تکنیکی پہلوؤں کا تفصیلی معائنہ کرکے ان کی جلد تکمیل کو یقینی بنائے گی۔ انہوں نے اس بات کی بھی یقین دہانی کرائی کہ سپاس نامے میں شامل تمام مطالبات منظور کیے جائیں گے۔وزیراعلیٰ محمد سہیل آفریدی نے اپنے پیغام میں اس عزم کا اظہار کیا کہ لوئر دیر کے غیور عوام کو کبھی مایوس نہیں کیا جائے گا اور علاقے میں ترقیاتی عمل مزید تیزی کے ساتھ جاری رکھا جائے گا۔
