وزیراعلیٰ سندھ سید مراد علی شاہ نے ہفتہ کے روز نیشنل اسٹیڈیم میں منعقدہ افتتاحی تقریب سے خطاب کرتے ہوئے کہا کہ 35ویں نیشنل گیمز پاکستان کی یکجہتی، تنوع اور قوت کی علامت ہیں۔ انہوں نے ملک بھر سے آئے کھلاڑیوں کو خوش آمدید کہتے ہوئے کہا کہ دو دہائیوں بعد کراچی میں نیشنل گیمز کی واپسی صوبے اور اس کے عوام کے لیے باعثِ فخر ہے۔ چیئرمین پاکستان پیپلز پارٹی بلاول بھٹو زرداری، صوبائی وزرا، سندھ اسمبلی اور کابینہ ارکان، پاکستان اولمپک ایسوسی ایشن کے عہدیداران، معزز مہمانوں، منتظمین اور ہزاروں شائقین کی موجودگی میں خطاب کرتے ہوئے وزیراعلیٰ نے کہا کہ تمام صوبوں اور خطوں سے آئے کھلاڑیوں کی بھرپور شرکت پاکستان کی حقیقی خوبصورتی کو اجاگر کرتی ہے۔ انہوں نے کہا یہ ہمارا میگا ایونٹ ہے۔ آج ہمارے تمام صوبوں اور خطوں کے رنگ کراچی میں جگمگا رہے ہیں۔ مراد علی شاہ نے شرکاء کو پرتپاک خوش آمدید کہتے ہوئے ان کی محنت اور نظم و ضبط کا اعتراف کیا جس کی بدولت وہ اس معزز پلیٹ فارم تک پہنچے ہیں۔ انہوں نے کہا آپ میں سے ہر ایک نے یہاں تک پہنچنے کے لیے غیر معمولی کوششیں کی ہیں۔ آپ کی موجودگی نہ صرف حکومتِ سندھ کے لیے اعزاز ہے بلکہ اس صوبے کے عوام کے لیے بھی باعثِ فخر ہے۔ مراد علی شاہ نے کہا کہ بیس سال بعد کراچی میں نیشنل گیمز کی میزبانی ایک تاریخی لمحہ ہے۔ انہوں نے کہا کہ سندھ کو یہ اعزاز حاصل ہے کہ وہ دیگر صوبوں، خطوں اور وفاقی اداروں سے آنے والے باصلاحیت کھلاڑیوں کی میزبانی کر رہا ہے۔ انہوں نے کہا سندھ کی تہذیبی عظمت اس کی بے مثال مہمان نوازی سے پہچانی جاتی ہے اور یقین دلایا کہ مقابلوں کے دوران شرکاء کو صوبے کی جانب سے ہر ممکن تعاون فراہم کیا جائے گا۔ وزیراعلیٰ نے کہا کہ نیشنل گیمز ملک کے اہم ترین کھیلوں کے مقابلوں میں سے ہیں کیونکہ یہ قومی یکجہتی کی علامت ہیں۔ انہوں نے کہا یہ مقابلے پاکستان کی اجتماعی قوت کی نمائندگی کرتے ہیں۔ ملک کے ہر گوشے سے کھلاڑی ایک پلیٹ فارم پر جمع ہوتے ہیں۔ مراد علی شاہ نے میگا ایونٹ کے لیے کی گئی وسیع تیاریاں اجاگر کرتے ہوئے بتایا کہ کراچی کے 24 مقامات پر 32 کھیلوں کے مقابلے منعقد کیے جا رہے ہیں جن میں تقریباً 10 ہزار کھلاڑی حصہ لے رہے ہیں۔ انہوں نے سندھ اسپورٹس ڈپارٹمنٹ اور سندھ اولمپک ایسوسی ایشن کی انتھک محنت کو سراہتے ہوئے کہا آپ کی لگن نے اس شاندار ایونٹ کی قدر میں بے حد اضافہ کیا ہے۔ کھلاڑیوں سے خطاب کرتے ہوئے وزیراعلیٰ نے کہا کہ جیت اور ہار کھیل کا حصہ ہیں لیکن نظم و ضبط، احترام اور اسپورٹس مین شپ ہی ایک حقیقی چیمپئن کی پہچان ہیں۔ انہوں نے کہا آپ صرف اپنے صوبے یا محکمے ہی نہیں بلکہ پوری قوم کے وقار کی نمائندگی کر رہے ہیں۔ مراد شاہ نے پیپلز پارٹی کے چیئرمین بلاول بھٹو زرداری کا بطور مہمانِ خصوصی شرکت پر شکریہ ادا کرتے ہوئے کہا کہ ان کی موجودگی پاکستان کے نوجوانوں کے لیے ایک مضبوط پیغامِ حوصلہ افزائی ہے۔ انہوں نے کہا چیئرمین بلاول بھٹو کی شرکت اس بات کا ثبوت ہے کہ وہ ملک بھر کے نوجوانوں کو بااختیار بنانے کے لیے پُرعزم ہیں۔ مراد علی شاہ نے کہا کہ سندھ حکومت نوجوانوں کی ترقی اور کھیلوں کے فروغ کے لیے پوری طرح پرعزم ہے۔ افتتاحی تقریب ایک مفصل پروگرام کے مطابق آگے بڑھی جس کا آغاز تلاوتِ قرآن پاک اور قومی ترانے سے ہوا۔ اس کے بعد آرگنائزنگ کمیٹی کے چیئرمین، پاکستان اولمپک ایسوسی ایشن کے صدر اور وزیراعلیٰ کے خطابات ہوئے۔ تقریب میں شیلڈ پیش کرنے کی رسم، کھلاڑیوں کا مارچ پاسٹ، کھلاڑیوں اور آفیشلز کی حلف برداری اور مشعل روشن کرنے کی تقریب بھی شامل تھی۔ تقریب کا اختتام چیئرمین بلاول بھٹو زرداری کے ان الفاظ کے ساتھ ہوا میں 35ویں نیشنل گیمز 2025 کے باضابطہ افتتاح کا اعلان کرتا ہوں۔
