پنجاب پلاننگ اینڈ ڈویلپمنٹ بورڈ نے مالی سال 2024-25 کے صوبائی ڈویلپمنٹ ورکنگ پارٹی کے نویں اجلاس میں مختلف سیکٹر زکی 4 ترقیاتی سکیموں کے لیے مجموعی طور پر 17 ارب 37کروڑ 41لاکھ 63 ہزار روپے کے فنڈز کی منظوری دی۔ اجلاس کی صدارت چیئرمین پی اینڈ ڈی بیرسٹر نبیل احمد اعوان نے کی۔
صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں وزیر اعلیٰ پنجاب لائیو سٹاک کارڈ کیلئے 4 ارب 44کروڑ 20لاکھ 80ہزار روپے، جنوبی پنجاب میں دیہی خواتین کو مویشیوں کے اثاثوں کی منتقلی کیلئے 2 ارب روپے، قائداعظم بزنس پارک شیخوپورہ میں گارمنٹ سٹی کے قیام کیلئے 5 ارب 34کروڑ 62لاکھ 11ہزار روپے اور 19 اضلاع میں سمارٹ سیف سٹیز پروگرام (فیز II) کیلئے 5 ارب 58کروڑ 58لاکھ 72 ہزار روپے شامل ہیں۔
اجلاس میں صوبائی سیکرٹری پی اینڈ ڈی بورڈ ڈاکٹر آصف طفیل سمیت چیف اکانومسٹ ناصر اقبال ملک، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
