محکمہ اینٹی کرپشن کی پھرتیاں،بغیر تفتیش،شواہد گرفتاریاں،افسران باعزت رہا،بیوروکریسی پر ہاتھ ڈالنے میں بھی ناکامی

محکمہ اینٹی کرپشن کی پھرتیاں بغیر شواہد اور تفتیش کے گرفتاریوں سے محکمہ کی ساکھ بری طرح متاثر ہوئی ہے۔فنی ماہرین مزاحیہ ماہرین ثابت ہوئے۔ضلع کونسل شیخوپورہ میں چھاپے کے دوران بیوٹیفکیشن کے پراجیکٹس کا ریکارڈ قبضہ میں لے کر چیف آفیسر اور ڈسٹرکٹ آفیسر انفراسٹرکچر اور ٹھیکیداروں کو بغیر ایف آئی آر گرفتار کر لیا گیا۔اینٹی کرپشن اسٹیبلشمنٹ کی طرف سے اربوں روپے کی کرپشن کا دعوٰی کیا گیا۔کھودا پہاڑ نکلا چوہا بھی نہیں۔چھان بین کے دوران نہ تو کرپشن کا کوئی ثبوت ملا نہ ہی افسران کی طرف سے کوئی بے قاعدگی سامنے آئی۔جس پر چیف آفیسر ضلع کونسل شیخوپورہ شہریار اور ڈسٹرکٹ آفیسر انفراسٹرکچر شہزاد صابر کو باعزت بری کرنا پڑا۔جنھیں رہائی بھی مل گئی۔لاہور نشتر زون کے ایک غیر قانونی نقشہ منظوری کے کیس میں سابق ایم او پلاننگ محمد سلیم،سابق زونل آفیسر پلاننگ طاہر گجر بلڈنگ انسپکٹر محمد علی اور پٹواری ریاض کو ریکارڈ پیش کرنے کے لئے طلب کیا گیا اور بغیر تفتیش گرفتاری ڈال دی گئی۔تفتیش میں یہ بات سامنے آئی کہ نقشہ کی منظوری میں ایک سابق ڈپٹی کمشنر،سابق چیف آفیسر ایم سی ایل اور سابق ڈپٹی چیف آفیسر ہیڈ کوارٹر ایم سی ایل کے دستخط بھی ہیں۔اصل منظوری سابق ڈپٹی کمشنر کے حکم پر دی گئی جس پر اب محکمہ اینٹی کرپشن افسران بالا کو طلب کرنے کی ہمت نہیں کر رہا ہے جس کی وجہ ضلع کونسل خانیوال میں ایک سابق خاتون ڈپٹی کمشنر کی گرفتاری کی کوشش میں ہونے والی سبکی اور بیوروکریسی کا سخت ردعمل ہے۔ضلع کونسل خانیوال کیس میں بھی محکمہ اینٹی کرپشن کو ٹھوس شواہد نہیں ملے ہیں۔وزیر اعلٰی پنجاب کے میڈیا سیل کی طرف سے بھی عجلت میں پریس ریلیز اور ٹیکرز جاری کر دیئے گئے۔سینئر صوبائی وزیر مریم اورنگزیب نے اسے ڈرامہ قرار دے دیا اور تردید جاری کرنا پڑی کہ سابق خاتون ڈپٹی کمشنر خانیوال کو گرفتار نہیں کیا گیا۔انکوائری چل رہی ہے جو میرٹ پر ہو گی۔محکمہ اینٹی کرپشن اسٹیبلشمنٹ کی جانب سے بیوروکریسی پر ہاتھ ڈالنے میں ناکامی پر اب بلدیاتی اداروں کے افسران کو ہراساں کرنے کی کوشش ہو رہی ہے۔جبکہ حقیقت یہ ہے کہ ای ٹینڈرنگ کے بعد سے بلدیاتی افسران محتاط چلے آ رہے ہیں کہ کسی طرح باعزت نوکری کر کے ریٹائرڈ ہو جائیں۔تاہم محکمہ اینٹی کرپشن کی پھرتیوں سے بیوروکریسی کو تو کوئی فرق نہیں پڑا تاہم ماضی کی طرح محکمہ لوکل گورنمنٹ اور کمزور اداروں کے افسران اور ملازمین کو حراساں کرنے میں کامیاب ضرور ہوئے ہیں۔