*وزیر ہاؤسنگ بلال یاسین کی زیر صدارت بینک آف پنجاب میں بلاسود قرضوں کی فراہمی سے متعلق اہم اجلاس*

صوبائی وزیر ہاؤسنگ اینڈ اربن ڈویلپمنٹ بلال یاسین کی زیر صدارت بینک آف پنجاب میں اپنی چھت اپنا گھر اور محفوظ چھت محفوظ گھر پروگرامز کے تحت بلاسود قرضوں کی فراہمی اور پیش رفت کا جائزہ لینے کیلئے اہم اجلاس ہوا۔اجلاس میں صوبائی وزیر بلال یاسین نے دونوں ہاؤسنگ پروگرامز پر عملدرآمد، قرضوں کی فراہمی اور مستحق درخواست گزاروں کو مالی معاونت کی فراہمی کے حوالے سے تفصیلی جائزہ لیا۔ سیکرٹری ہاؤسنگ نورالامین مینگل، صدر بینک آف پنجاب ظفر مسعود اور پنجاب ہاؤسنگ اینڈ ٹاؤن پلانگ حکام نے پروگرامز کی موجودہ کارکردگی اور پیش رفت پر بریفنگ دی۔اخوت اور دیگر مائیکرو فنانس اداروں کے نمائندگان نے مستحق درخواست گزاروں کی جانچ پڑتال، قرضوں کی فراہمی اور جاری پروگرامز پر عملدرآمد کے حوالے سے آگاہ کیا۔ اجلاس میں قرضوں کی فراہمی کے طریقہ کار کو مزید آسان، شفاف اور تیز رفتار بنانے کیلئے مختلف تجاویز پر بھی غور کیا گیا۔صوبائی وزیر بلال یاسین نے اپنی چھت اپنا گھر پروگرام کی عوامی مقبولیت اور مختلف اضلاع سے موصول ہونے والی درخواستوں کا جائزہ لیتے ہوئے کہا کہ وزیراعلیٰ پنجاب مریم نواز شریف دیگر اضلاع کے دوروں کے دوران اپنی چھت اپنا گھر پروگرام سے مستفید ہونے والے خاندانوں سے بھی ملاقاتیں کریں گی۔انہوں نے کہا کہ کم آمدن والے خاندانوں کو محفوظ رہائشی سہولیات کی فراہمی حکومت کی اولین ترجیحات میں شامل ہے۔ وزیراعلیٰ پنجاب مریم نواز شریف کا ویژن ہے کہ ہر مستحق خاندان اپنے گھر کے خواب کو حقیقت میں بدل سکے۔بلال یاسین نے واضح کیا کہ حکومت پنجاب عوام کو بلاسود مالی معاونت فراہم کرکے گھروں کی تعمیر میں درپیش مالی مشکلات کم کر رہی ہے۔ مالی وسائل کی کمی کسی بھی مستحق خاندان کے اپنے گھر کے خواب کی راہ میں رکاوٹ نہیں بننے دی جائے گی۔صوبائی وزیر نے ہدایت کی کہ ہاؤسنگ پروگرامز کے مقررہ اہداف کے حصول کیلئے متعلقہ ادارے باہمی رابطوں کو مزید مؤثر بنائیں اور عملی اقدامات میں تیزی لاتے ہوئے قرضوں کی فراہمی کے عمل کو سہل اور شفاف بنایا جائے۔