معاون خصوصی برائے اطلاعات، ایمان شاہ نے کہا ہے کہ گلگت بلتستان کے مختلف اضلاع میں شدید بارشوں کے بعد پیدا ہونے والی سیلابی صورتحال نے تباہی مچا دی۔ بالخصوص تھک-بابوسر شاہراہ پر آنے والے اچانک اور خطرناک سیلابی ریلے نے سیاحوں اور مقامی آبادی کو بری طرح متاثر کیا، جس کے نتیجے میں قیامت خیز مناظر دیکھنے میں آئے۔ معاون خصوصی برائے اطلاعات ایمان شاہ نے واقعے پر گہرے رنج و غم کا اظہار کرتے ہوئے قیمتی انسانی جانوں کے ضیاع پر انتہائی دکھ کا اظہار کر دیا۔ انہوں نے متاثرہ خاندانوں کے ساتھ بھرپور اظہارِ یکجہتی کرتے ہوئے یقین دہانی کرائی کہ حکومت گلگت بلتستان ہر ممکن امداد فراہم کر رہی ہے اور ریسکیو آپریشن میں تمام دستیاب وسائل بروئے کار لائے جا رہے ہیں۔ایمان شاہ کا کہنا تھا کہ وزیر اعلیٰ گلگت بلتستان نے واقعے کا نوٹس لیتے ہوئے فوری طور پر ضلعی انتظامیہ اور ریسکیو اداروں کو متحرک کر دیا ہے۔ متاثرہ علاقوں میں ریلیف کی فراہمی، زخمیوں کا علاج، اور لاپتہ افراد کی تلاش حکومت کی اولین ترجیح ہے۔عوام سے اپیل کی گئی ہے کہ وہ خراب موسم اور مسلسل بارشوں کے پیش نظر غیر ضروری سفر سے گریز کریں، خاص طور پر تھک-بابوسر، دیامر، ہنزہ اور سکردو جیسے حساس علاقوں میں۔ اس کے ساتھ ساتھ، شہریوں کو ہدایت کی گئی ہے کہ کسی بھی ایمرجنسی کی صورت میں فوری طور پر مقامی انتظامیہ سے رابطہ کریں۔
عوام ،تھک-بابوسر، دیامر، ہنزہ اور سکردو جیسے حساس علاقوں میں میں سفر سے گریز کریں،معاون خصوصی برائے اطلاعات گلگت بلتستان ایمان شاہ
