وزیراعلیٰ سندھ سید مراد علی شاہ نے بلوچ یومِ ثقافت کے موقع پر اپنے خصوصی پیغام میں دنیا بھر بالخصوص سندھ میں مقیم بلوچ برادری کو دلی مبارکباد پیش کی ہے۔ اپنے پیغام میں وزیراعلیٰ سندھ نے کہا کہ بلوچ ثقافت پاکستان کا قیمتی سرمایہ اور قومی یکجہتی کی علامت ہے۔ انہوں نے کہا کہ سندھ میں بسنے والے بلوچ ہماری مشترکہ تاریخ، تہذیب اور شناخت کا قابلِ فخر حصہ ہیں۔ سید مراد علی شاہ نے کہا کہ اپنی زبان، روایات اور ثقافت کو فروغ دے کر ہی قومیں اپنا تشخص مضبوط بناتی ہیں۔ انہوں نے بلوچ روایات کو بہادری، غیرت اور وفاداری کی روشن مثال قرار دیتے ہوئے کہا کہ یہ اقدار ہماری اجتماعی شناخت کو مزید مضبوط بناتی ہیں۔ وزیراعلیٰ سندھ نے اس بات پر زور دیا کہ سماج میں ہم آہنگی اور بھائی چارے کے فروغ کے لیے مثبت ثقافتی سرگرمیوں کو بڑھانا ناگزیر ہے۔ انہوں نے واضح کیا کہ سندھ حکومت ثقافتی تنوع کے تحفظ اور فروغ کے لیے پُرعزم ہے اور اس سلسلے میں ہر ممکن اقدامات جاری رکھے جائیں گے۔ وزیراعلیٰ سندھ نے اس عزم کا اعادہ کیا کہ صوبے میں بسنے والی تمام برادریوں کے ثقافتی حقوق کا مکمل احترام کیا جائے گا۔
