وزیراعلیٰ سندھ سید مراد علی شاہ نے ہفتہ کو مختلف مکاتب فکر کے ممتاز علما اور اعلیٰ سرکاری افسران کے اجلاس کی صدارت کرتے ہوئے 12 ربیع الاول کے انتظامات کا جائزہ لیا اور تمام متعلقہ محکموں کو صوبے بھر میں فول پروف سیکیورٹی، شہری سہولیات کی بلا تعطل فراہمی، صفائی ستھرائی اور میلاد جلوسوں و مذہبی اجتماعات کے پُرامن انعقاد کو یقینی بنانے کی ہدایت کی۔اجلاس میں سینئر وزیر اطلاعات شرجیل انعام میمن، وزیر بلدیات ناصر شاہ، وزیر داخلہ ضیاء الحسن لنجار، وزیر مذہبی امور ریاض شاہ شیرازی، میئر کراچی بیرسٹر مرتضیٰ وہاب، چیف سیکریٹری آصف حیدر شاہ، پرنسپل سیکریٹری وزیراعلیٰ آغا واصف عباس، ایڈیشنل چیف سیکریٹری داخلہ اقبال میمن، سیکریٹری بلدیات وسیم شمشاد، انسپکٹر جنرل پولیس جاوید عالم اوڈھو، کمشنر کراچی سید حسن نقوی، ایڈیشنل آئی جی کراچی آزاد خان، ڈی آئی جی ٹریفک پیر محمد شاہ، چیف ایگزیکٹو آفیسر واٹر کارپوریشن احمد علی صدیقی، منیجنگ ڈائریکٹر سندھ سالڈ ویسٹ مینجمنٹ بورڈ فواد غفار سومرو، کے الیکٹرک اور ایس ایس جی سی کے نمائندگان کے علاوہ ڈویژنل کمشنرز اور ڈی آئی جیز نے بذریعہ ویڈیو لنک شرکت کی۔مختلف مکاتب فکر کی نمائندگی کرنے والے ممتاز علما، جن میں حاجی حنیف طیب، مفتی رزاق یعقوب عطاری، علامہ شاہ عبد الحق قادری، مفتی نظیر جان نعیمی، حاجی رفیق پردیسی، مولانا محمد اکبر درس، علامہ لیاقت حسین الازہری، مولانا قاضی احمد نورانی، علامہ ڈاکٹر جمیل راٹھور، علامہ مظفر حسین شاہ، صاحبزادہ ریحان امجدی نعمانی، ثروت اعجاز قادری، مفتی محمد قاسم، شاہد غوری، عاطف حنیف بِلّو، علامہ شاہ اویس نورانی، مولانا کوکب نورانی اوکاڑوی، علامہ اشرف گورمانی، مفتی عابد مبارک، مولانا سید اظہر علی شاہ ہمدانی اور دیگر شامل تھے، نے بھی اجلاس میں شرکت کی اور عید میلاد النبی ﷺ کے موقع پر سیکیورٹی، شہری سہولیات، صفائی ستھرائی، ٹریفک مینجمنٹ اور عوامی سہولت سے متعلق اپنی تجاویز پیش کیں۔وزیراعلیٰ سندھ نے علما کرام کی آرا اور تجاویز تفصیل سے سنیں اور تمام متعلقہ محکموں کو ان کے تحفظات ترجیحی بنیادوں پر دور کرنے کی ہدایت کی۔وزیراعلیٰ سندھ سید مراد علی شاہ نے کہا کہ عید میلاد النبی ﷺ ایک مقدس موقع ہے جسے گہری عقیدت اور احترام کے ساتھ منایا جاتا ہے۔ یہ ہماری اجتماعی ذمہ داری ہے کہ عقیدت مند پُرامن، محفوظ اور صاف ستھرے ماحول میں مذہبی سرگرمیوں میں شرکت کرسکیں۔انہوں نے کے الیکٹرک، ایس ایس جی سی، واٹر کارپوریشن اور دیگر یوٹیلیٹی سروس فراہم کرنے والے اداروں کو مساجد، جلوسوں اور میلاد اجتماعات والے علاقوں میں بجلی، گیس اور پانی کی بلا تعطل فراہمی یقینی بنانے کی ہدایت کی۔وزیراعلیٰ سندھ نے کہا کہ مساجد، امام بارگاہوں، جلوسوں کے راستوں اور مذہبی اجتماعات کے مقامات کے اطراف ضروری شہری سہولیات میں کسی قسم کی رکاوٹ نہیں ہونی چاہیے۔ تمام یوٹیلیٹی ادارے مکمل طور پر چوکس اور فوری ردعمل کے لیے تیار رہیں۔سید مراد علی شاہ نے کراچی میٹروپولیٹن کارپوریشن، میونسپل کمیٹیوں، ضلعی انتظامیہ، بلدیاتی اداروں اور سندھ سالڈ ویسٹ مینجمنٹ بورڈ کو 12 ربیع الاول سے قبل اور اس دوران خصوصی صفائی مہم شروع کرنے کی بھی ہدایت کی۔انہوں نے کہا کہ صفائی ہمارے ایمان کا لازمی حصہ ہے۔ جلوسوں کے راستوں، اطراف کے علاقوں اور عوامی مقامات کو صاف ستھرا رکھا جائے۔ نکاسی آب اور سیوریج سے متعلق تمام مسائل تقریبات سے بہت پہلے حل کیے جائیں۔وزیراعلیٰ سندھ نے صوبے بھر کے بلدیاتی حکام کو ہدایت کی کہ خراب سڑکوں، بند نالوں، ابلتے ہوئے سیوریج اور دیگر شہری مسائل کی نشاندہی کرکے انہیں فوری طور پر دور کیا جائے تاکہ 12 ربیع الاول کی تقریبات کے دوران عوام کو کسی قسم کی پریشانی کا سامنا نہ کرنا پڑے۔سیکیورٹی انتظامات کے حوالے سے سید مراد علی شاہ نے پولیس، رینجرز اور ضلعی انتظامیہ کو تمام جلوسوں، اجتماعات اور مذہبی تقریبات کے لیے جامع سیکیورٹی اقدامات یقینی بنانے کی ہدایت کی۔انہوں نے کہا کہ شرکا کی حفاظت ہماری اولین ترجیح ہے۔ مربوط سیکیورٹی پلان پر عملدرآمد، مسلسل نگرانی اور قانون نافذ کرنے والے اہلکاروں کی مؤثر تعیناتی یقینی بنائی جائے۔آئی جی پولیس اور دیگر حکام نے اجلاس کو مجوزہ سیکیورٹی پلان، ٹریفک مینجمنٹ کے انتظامات اور 12 ربیع الاول کے موقع پر قائم کیے جانے والے رابطہ کار نظام سے متعلق بریفنگ دی۔وزیراعلیٰ سندھ نے بین المسالک ہم آہنگی اور مذہبی رواداری کی اہمیت پر زور دیتے ہوئے امن اور اتحاد کے فروغ میں تمام مکاتب فکر کے علما کے مثبت کردار کو سراہا۔انہوں نے کہا کہ ہماری طاقت اتحاد میں ہے۔ حضرت محمد مصطفیٰ ﷺ کا پیغام امن، رحمت، رواداری اور بھائی چارے کا پیغام ہے۔ ہمیں ان اقدار کو اپنانا اور اس بابرکت موقع کو وقار اور ہم آہنگی کے ساتھ منانا چاہیے۔اجلاس کے اختتام پر سید مراد علی شاہ نے تمام ڈویژنل کمشنرز، ڈپٹی کمشنرز، پولیس افسران اور بلدیاتی اداروں کو قریبی رابطہ برقرار رکھنے اور 12 ربیع الاول سے بہت پہلے تمام انتظامات مکمل کرنے کی ہدایت کی۔ انہوں نے افسران کو مسلسل نگرانی جاری رکھنے اور منتظمین و عوام کی جانب سے رپورٹ کیے جانے والے مسائل کو فوری طور پر حل کرنے کی بھی ہدایت کی۔
*وزیراعلیٰ سندھ مراد علی شاہ کی زیرصدارت 12 ربیع الاول کی تیاریوں پر مختلف مکاتب فکر کے علما اور اعلیٰ حکام کا اہم اجلاس*
