وزیراعلیٰ سندھ سید مراد علی شاہ نے بدھ کو پولیو کے خاتمے کے لیے قائم صوبائی ٹاسک فورس (پی ٹی ایف) کے اجلاس کی صدارت کی اور صوبے میں پولیو وائرس کے خلاف پیش رفت کا جائزہ لیا۔ انہوں نے کہا کہ سندھ نے 2024 میں 23 اور 2025 میں 9 کیسز کے مقابلے میں 2026 میں اب تک پولیو کے صرف ایک کیس تک کمی حاصل کی ہے، جبکہ ماحولیاتی نگرانی سے ظاہر ہوتا ہے کہ وائرس کی گردش چند باقی ماندہ ہائی رسک علاقوں تک محدود ہوتی جارہی ہے۔وزیراعلیٰ نے بیماری کے خاتمے کے لیے حکومت کے عزم کا اعادہ کرتے ہوئے حکام کو ہدایت کی کہ 21 سے 27 ستمبر تک ہونے والی ذیلی قومی حفاظتی ٹیکہ جات مہم (ایس این آئی ڈیز) سے قبل ویکسینیشن، نگرانی اور کمیونٹی سے رابطے کی کوششیں مزید تیز کی جائیں۔مراد علی شاہ نے کہا کہ سندھ کی جانب سے حاصل کی گئی پیش رفت حوصلہ افزا ہے اور ہمارے صحت کارکنوں، ضلعی انتظامیہ اور شراکت دار اداروں کی محنت کی عکاسی کرتی ہے لیکن ہمارا مشن اس وقت تک مکمل نہیں ہوگا جب تک ہر بچے کو تحفظ حاصل نہیں ہوجاتا اور ہر ضلع سے وائرس کا خاتمہ نہیں ہوجاتا۔ کسی بھی بچے کو غفلت، کمزور نگرانی یا فالو اَپ نہ ہونے کے باعث ویکسین سے محروم نہیں رہنا چاہیے۔‘‘وزیراعلیٰ ہاؤس میں منعقدہ اجلاس میں وزیر صحت ڈاکٹر عذرا فضل پیچوہو، چیف سیکریٹری آصف حیدر شاہ، میئر کراچی مرتضیٰ وہاب، آئی جی پولیس سندھ جاوید عالم اوڈھو، کمشنر کراچی حسن نقوی، صوبائی سیکریٹریز، صوبائی کوآرڈینیٹر ایمرجنسی آپریشنز سینٹر (ای او سی) شہریار گل، سندھ حکومت کے شراکت دار اداروں اور ڈپٹی کمشنرز نے شرکت کی۔ دیگر اضلاع کے کمشنرز، ڈی آئی جیز، ڈپٹی کمشنرز اور ایس ایس پیز نے ویڈیو لنک کے ذریعے شرکت کی۔اجلاس کو بریفنگ دیتے ہوئے وزیر صحت ڈاکٹر عذرا فضل پیچوہو نے بتایا کہ پاکستان میں وائلڈ پولیو وائرس (ڈبلیو پی وی ون) کے کیسز 2024 میں 74 سے کم ہوکر 2025 میں 31 رہ گئے جبکہ 2026 میں اب تک صرف 3 کیسز رپورٹ ہوئے ہیں۔ سندھ میں رواں سال صرف ایک کیس ریکارڈ کیا گیا ہے جو 10 فروری کو سجاول سے رپورٹ ہوا، جبکہ گزشتہ سال 9 اور 2024 میں 23 کیسز رپورٹ ہوئے تھے۔ای او سی کے انچارج شہریار گل نے وزیراعلیٰ کو بتایا کہ ماحولیاتی نگرانی کے اعدادوشمار سے صوبے بھر میں وائرس کی گردش میں نمایاں کمی ظاہر ہوتی ہے۔ مثبت ماحولیاتی نگرانی کے مقامات کی تعداد مارچ 2025 میں 29 کی بلند ترین سطح سے کم ہوکر اگست 2026 میں صرف 5 رہ گئی ہے۔ کراچی سے باہر نگرانی کے تمام 14 مقامات اس وقت منفی ہیں، جبکہ کراچی کے 15 میں سے 6 مقامات بدستور مثبت ہیں، جس سے ظاہر ہوتا ہے کہ وائرس کی منتقلی شہر کے محدود علاقوں تک تیزی سے محدود ہورہی ہے۔اجلاس کو بتایا گیا کہ 2025 میں وائرس کی زیادہ منتقلی کے موسم کے دوران کراچی میں پولیو کا کوئی تصدیق شدہ کیس سامنے نہ آنا، اس کے باوجود کہ بعض ماحولیاتی نمونے مثبت تھے، معمول کی حفاظتی ویکسینیشن اور بار بار کی جانے والی ویکسینیشن مہمات کے ذریعے حاصل ہونے والی آبادی کی مضبوط قوتِ مدافعت کی عکاسی کرتا ہے۔چیف سیکریٹری آصف حیدر شاہ نے مشاہدہ کیا کہ مسلسل حفاظتی ٹیکہ جات کی کوششوں نے ان علاقوں میں بھی کلینیکل کیسز کی روک تھام میں مدد دی ہے جہاں ماحولیاتی نگرانی کے ذریعے وائرس کی گردش کا پتا چل رہا ہے۔پولیو کیسز میں کمی کے رجحان پر اطمینان کا اظہار کرتے ہوئے وزیراعلیٰ نے زور دیا کہ پولیو کا ایک کیس بھی ایک کیس زیادہ ہے اور تمام کمشنرز، ڈپٹی کمشنرز اور ضلعی محکمہ صحت کے حکام کو ہدایت کی کہ ویکسین سے محروم بچوں، انکار کرنے والے والدین اور انتظامی خامیوں کے معاملے میں زیرو ٹالرنس کا طریقہ اختیار کیا جائے۔نگرانی کے نتائج کا جائزہ لیتے ہوئے انہوں نے کراچی اور دیگر نشاندہی کردہ ہائی رسک علاقوں میں ویکسینیشن اور نگرانی کی کوششیں مزید تیز کرنے، کراچی ایکشن پلان 2.0 پر مکمل عمل درآمد، ضلعی انتظامیہ اور محکمہ صحت کے حکام کے درمیان بہتر رابطہ، نقل مکانی کرنے والی اور متحرک آبادیوں کی زیادہ قریب سے نگرانی اور کم سہولت یافتہ آبادیوں میں معمول کی حفاظتی ویکسینیشن کی کوریج بہتر بنانے کا حکم دیا۔انہوں نے کہا کہ ماحولیاتی نمونے انتباہی اشارے ہیں۔ وائرس کے ایسے بچوں تک پہنچنے سے پہلے ہمیں کارروائی کرنا ہوگی جو اس کے لیے حساس ہیں۔اجلاس میں 2026 کے دوران چلائی جانے والی خصوصی بوسٹر ڈوز مہمات کا بھی جائزہ لیا گیا۔ ای او سی کے کوآرڈینیٹر شہریار گل نے بتایا کہ کراچی میں تقریباً 30 لاکھ زبانی پولیو ویکسین (او پی وی) کی خوراکیں اور 28 لاکھ 90 ہزار بوسٹر ڈوز دی گئیں، جبکہ دیگر ڈویژنز میں مہمات کے دوران تقریباً 27 لاکھ او پی وی خوراکیں اور 25 لاکھ 80 ہزار بوسٹر ڈوز دی گئیں۔ عمر کی حد میں توسیع کی حکمت عملی کے ذریعے اسکولوں اور کمیونٹی کی سطح پر اقدامات کے ذریعے بڑے بچوں تک بھی رسائی حاصل کی گئی۔وزیراعلیٰ نے دور دراز اور دشوار گزار علاقوں میں کام کرنے والے فرنٹ لائن ورکرز، اساتذہ، کمیونٹی موبلائزرز اور محکمہ صحت کے عملے کی کوششوں کو سراہتے ہوئے انہیں پولیو کے خاتمے کے پروگرام کی ریڑھ کی ہڈی قرار دیا۔ٹاسک فورس کو بتایا گیا کہ جولائی 2026 کی ایس این آئی ڈیز مہم کے بعد ان بچوں کو ویکسین پلانے کے لیے 10 روزہ خصوصی فالو اَپ مہم شروع کی گئی جو ابتدائی طور پر ویکسین سے محروم رہ گئے تھے۔ ویکسین سے محروم رہ جانے والے 146,149 بچوں میں سے 23,500 سے زائد بچوں کو انکار کرنے والے اور دستیاب نہ ہونے والے بچوں پر توجہ مرکوز کرتے ہوئے ہدفی کوششوں کے ذریعے بعد ازاں ویکسین دی گئی۔مراد شاہ نے ضلعی انتظامیہ کو ہدایت کی کہ کمیونٹی سے مضبوط رابطے اور عوامی آگاہی مہمات کے ذریعے ویکسین سے انکار کی شرح مزید کم کی جائے۔ انہوں نے زور دیا کہ والدین کا اعتماد حاصل کرنا پروگرام کی کامیابی کے لیے بدستور انتہائی اہم ہے۔اجلاس میں 21 سے 27 ستمبر تک ہونے والی ایس این آئی ڈیز مہم کی تیاریوں کا جائزہ لیا گیا، جس کے دوران سندھ بھر میں 5 سال سے کم عمر تقریباً ایک کروڑ بچوں کو ویکسین پلائی جائے گی۔ مہم 23 مکمل اضلاع اور 7 جزوی اضلاع کی منتخب یونین کونسلز میں چلائی جائے گی، جس میں 80 ہزار سے زائد فرنٹ لائن ورکرز حصہ لیں گے۔حکام نے بتایا کہ سکیورٹی فرائض کے لیے 26 ہزار سے زائد پولیس اہلکار تعینات کیے گئے ہیں۔ وزیراعلیٰ نے مہم کے لیے صوبائی حکومت کی مالی معاونت کا اعادہ کیا اور بتایا کہ فرنٹ لائن ورکرز کے لیے مراعات میں 28 فیصد اضافہ کیا گیا ہے۔انہوں نے تمام اضلاع کو ہدایت کی کہ مہم شروع ہونے سے قبل ویکسین کی فراہمی، لاجسٹکس، افرادی قوت کی تعیناتی اور نگرانی کے انتظامات سمیت باقی ماندہ تیاریوں کے اقدامات مکمل کیے جائیں۔وزیراعلیٰ نے مہم کے معیار کے اشاریوں کا بھی جائزہ لیا اور انہیں بتایا گیا کہ سندھ نے معمول کی حفاظتی ویکسینیشن، نگرانی، افرادی قوت اور کمیونٹی سے رابطے کے شعبوں میں اہم اصلاحات پر کام جاری رکھتے ہوئے کارکردگی کے مضبوط معیار کو برقرار رکھا ہے۔اجلاس کے اختتام پر مراد شاہ نے پولیو سے پاک مستقبل کے حصول کے لیے سندھ کے عزم کا اعادہ کیا۔ انہوں نے کہا کہ ہم نے نمایاں پیش رفت کی ہے، لیکن پولیو کے خلاف جنگ کا یہ سب سے اہم مرحلہ ہے۔ ہر محکمہ، ہر ضلعی انتظامیہ اور ہر فرنٹ لائن ورکر کو اس وقت تک مکمل توجہ مرکوز رکھنا ہوگی جب تک وائرس کی منتقلی مستقل طور پر روک نہیں دی جاتی۔ ستمبر اور دسمبر میں ہونے والی آئندہ مہمات انتہائی اہم ہیں اور کسی بھی علاقے کو پیچھے نہیں چھوڑا جانا چاہیے۔
