ڈپٹی کمشنر لاہور سید موسیٰ رضا کی قیادت میں ضلعی انتظامیہ نے شہر کی بہتری کے لیے ضروری اقدامات اٹھائے ہیں۔ انتظامیہ نے لاہور کو صاف ستھرا اور منظم بنانے کے لیے متعدد شعبوں میں اپنی کارکردگی کو بہتر کیا ہے۔ ڈی سی لاہور نے تحصیل راوی کا دورہ کیا، جہاں انہوں نے انتظامی امور کا جائزہ لیا اور متعلقہ حکام کو فوری اصلاحات کی ہدایات دیں۔ اس دورے میں چیف آفیسر میٹروپولیٹن کارپوریشن لاہور، ایڈیشنل ڈپٹی کمشنر جنرل، اور اسسٹنٹ کمشنر راوی سیدہ سنبل جاوید بھی ہمراہ تھیں، جنہوں نے ڈی سی کو تفصیلی بریفنگ دی۔ ڈپٹی کمشنر نے سیوریج کے ناقص نظام پر سخت برہمی کا اظہار کیا اور واٹر اینڈ سینی ٹیشن ایجنسی (واسا) حکام کو فوری بہتری کے احکامات دیے۔ انہوں نے ہدایت کی کہ شہر سے بینرز، پوسٹرز اور غیر قانونی تجاوزات کا خاتمہ کیا جائے۔ اس کے علاوہ، رہائشی علاقوں سے جھگیوں اور مویشیوں کے باڑوں کو فوری ہٹانے کے احکامات بھی جاری کیے گئے۔ ڈی سی نے زور دیا کہ شہر کی صفائی کے لیے کوئی کسر نہ چھوڑی جائے اور گھر گھر سے کوڑا اٹھانے کا عمل روزانہ کی بنیاد پر یقینی بنایا جائے۔ انہوں نے کوڑے کو آگ لگانے والوں کے خلاف سخت کارروائی کا حکم دیا اور شہریوں میں صفائی کے بارے میں آگاہی مہم چلانے کی ہدایت کی۔ ڈی سی سید موسیٰ رضا نے واضح کیا کہ فرائض میں غفلت برتنے والے افسران کے ساتھ کوئی رعایت نہیں کی جائے گی۔ ان کی قیادت میں ضلعی انتظامیہ نے صبح سویرے صفائی کے عمل کو یقینی بنانے کے لیے خصوصی اقدامات اٹھائے ہیں، جس سے شہر کی مجموعی صفائی کی صورتحال میں نمایاں بہتری آئی ہے۔ ان کوششوں سے لاہور کے رہائشیوں کے لیے صاف ستھرا اور بہتر ماحول یقینی بنایا جا رہا ہے۔
ڈی سی لاہور کا تحصیل راوی کا دورہ،انتظامی امور کا جائزہ، متعلقہ حکام کو فوری اصلاحات کی ہدایات
