کراچی میں سندھ کے سینئر وزیر شرجیل انعام میمن کی زیر صدارت ایک اعلیٰ سطح کا اجلاس ہوا، اجلاس میں سیکریٹری ٹرانسپورٹ اسد ضامن، ماس ٹرانزٹ اتھارٹی کے ایم ڈی کمال حکیم دایو، سی ای او ٹرانس کراچی شمائلہ محسن اور دیگر نے شرکت کی۔ اجلاس میں گرین لائن بس سروس کے آپریشنز کا تفصیلی جائزہ لیا گیا اور سندھ کے سینئر وزیر شرجیل انعام میمن کو گرین لائن منصوبے پر تفصیلی بریفنگ دی گئی۔ اجلاس میں گرین لائن منصوبے کو اورنج لائن سے جوڑنے والے منصوبے پر بھی تفصیلی بات چیت کی گئی۔ اجلاس میں سینئر وزیر شرجیل انعام میمن نے گرین لائن کو اورنج لائن سے جوڑنے والے منصوبے کو جلد از جلد پایہ تکمیل تک پہنچانے کی ہدایات جاری کیں۔ اجلاس میں پبلک ٹرانسپورٹ کے شعبے میں حکومت سندھ کے جاری آپریشنز، یوٹیلیٹی سروسز، اور گرین لائن بس سروس کے لیے سبسڈیز پر بھی تبادلہء خیال کیا گیا۔ اجلاس کے موقع پر بات کرتے ہوئے سندھ کے سینئر وزیر اور صوبائی وزیر برائے اطلاعات، ٹرانسپورٹ، ماس ٹرانزٹ، ایکسائز، ٹیکسیشن و نارکوٹکس کنٹرول شرجیل انعام میمن نے کہا کہ گرین لائن منصوبہ کراچی کے پبلک ٹرانسپورٹ سسٹم کا ایک اہم جزو ہے، وفاقی حکومت کی جانب سے گرین لائن منصوبہ دسمبر 2024 میں حکومت سندھ کے حوالے کر دیا جائے گا۔
انہوں نے کہا کہ حکومت سندھ چاہتی ہے کہ گرین لائن کو اورنج لائن کو جوڑنے والا منصوبہ دسمبر 2024 سے پہلے ہی مکمل ہوجائے۔ سینئر وزیر شرجیل انعام میمن نے کہا کہ وفاقی حکومت کی جانب سے گرین لائن کے آپریشنز کے لئے سالانہ 2 ارب کی سبسڈی دی جارہی ہے، حکومت سندھ اس پر نظرثانی کرے گی، گرین لائن منصوبہ وفاق سے حکومت سندھ کو منتقل ہونے کے بعد شہریوں کے لیے ٹرانسپورٹ مزید موثر اور بہتر بنانے کے لئے اس میں مزید بسیں شامل کی جائیں گی۔ انہوں نے مزید کہا کہ پہلے سے جاری حکومت سندھ کے پبلک ٹرانسپورٹ کے منصوبوں کی وجہ سے عوام نے سکھ کا سانس لیا ہے، پبلک ٹرانسپورٹ کراچی کا دیرینہ مسئلہ رہا ہے، ہم چاہتے ہیں کہ ٹرانسپورٹ کے نظام میں زیادہ سے زیادہ بہتری لائی جائے تاکہ عوام کو زیادہ سے زیادہ ریلیف مل سکے۔
