وزیر بلدیات سندھ و صدر پاکستان پیپلز پارٹی کراچی ڈویژن سعید غنی کی زیر صدارت پیپلز پارٹی کراچی ڈویژن کا اہم اجلاس منعقد ہوا۔اجلاس میں پیپلز پارٹی سندھ کے جنرل سیکرٹری و وزیر اعلٰی سندھ کے معاون خصوصی سید وقار مہدی، ڈپٹی میئر کراچی سلمان عبداللہ مراد، کراچی ڈویژن کے جنرل سیکرٹری و ڈسٹرکٹ سائوتھ کے صدر جاوید ناگوری، پیپلز پارٹی خواتین ونگ کراچی کی صدر ڈاکٹر شاہدہ رحمانی، راجہ رزاق، مرزا مقبول، محمد آصف خان، شکیل چوہدری، تمام اضلاع کے صدور و جنرل سیکرٹریز، پیپلز پارٹی کے تمام ٹاؤنز کے چیئرمینز، ذیلی تنظیموں کے عہدیداران و دیگر نے شرکت کی۔
اجلاس میں 30 نومبر کو نشتر پارک میں پیپلز پارٹی کے یوم تاسیس کے حوالے سے منعقد ہونے والے جلسے کی تیاریوں کے حوالے سے تفصیلی تبادلہ خیال کیا گیا۔سعید غنی نے کہا کہ کراچی میں یوم تاسیس کے سلسلے میں نشتر پارک میں جلسہ منعقد کیا جائے گا، جس سے چیئرمین بلاول بھٹو زرداری ویڈیو لنک کے ذریعے خطاب کریں گے۔ یوم تاسیس کے موقع پر ملک بھر میں تقریبات کا انعقاد کیا جائے گا۔جلسے کی تیاریاں زور و شور سے شروع کی جارہی ہیں۔ یوم تاسیس کے حوالے سے منعقد ہونے والے جلسہ کے لئے شہر بھر میں کیمپ لگائے جائیں گے اور بینرز آویزاں کئے جائیں گے۔اس بار کراچی کے عوام نے ضمنی انتخابات میں پاکستان پیپلز پارٹی کے امیدواروں کو بھاری اکثریت سے کامیاب کروایا، جس پر ہم ان کے شکر گزار ہیں۔کراچی ڈویژن، تمام ڈسٹرکٹ کی تنظیموں اور ٹاؤنز و تمام ذیلی تنظیموں کے عہدیداران و کارکنان کو بلدیاتی ضمنی انتخابات میں بھرپور کامیابی پر مبارکباد پیش کرتے ہیں۔وقار مہدی نے کہا کہ پاکستان پیپلز پارٹی کے چیئرمین بلاول بھٹو زرداری کے وژن کے تحت کراچی کے مسائل کو ہر صورت ترجیعی بنیادوں پر حل کیا جارہا ہے۔
