محکمہ بلدیات پنجاب نے تمام بلدیاتی اداروں کو اسٹیٹ لائف انشورنس کارپوریشن آف پاکستان کو بقایا ماہانہ پریمیم کی ادائیگی یقینی بنانے کے احکامات جاری کردیئے ہیں۔بلدیاتی اداروں کے چیف افسران کو تین دن کی مہلت دی گئی ہے ۔ناکامی یا کوتاہی کی صورت میں سخت تادیبی کارروائی عمل میں لائی جائے گی۔محکمہ بلدیات نے میٹروپولیٹن کارپوریشن، میونسپل کارپوریشنز، میونسپل کمیٹیوں اور ضلع کونسلز کو جاری مراسلہ میں اسٹیٹ لائف کو ماہانہ گروپ انشورنس پریمیم کی مد میں بڑی رقم ادا نہ کرنے پر تشویش کا اظہار کیا ہے اور واضع کیا ہے کہ بلدیاتی اداروں کے ملازمین کے لئے اسٹیٹ لائف انشورنس کارپوریشن آف پاکستان کے بقایا پریمیم کی فوری ادائیگیاں کی جائیں۔ایڈیشنل سیکرٹری ایڈمن لوکل گورنمنٹ اینڈ کمیونٹی ڈویلپمنٹ کی زیر صدارت اجلاس میں ہونے والے فیصلے کی روشنی میں مراسلہ جاری کیا گیا ہے۔
