وزیراعلیٰ کے مشیر برائے خزانہ مزمل اسلم اور ایڈیشنل چیف سیکرٹری منصوبہ بندی کے علاؤہ محکمہ خزانہ، منصوبہ بندی اور مواصلات کے اعلیٰ حکام کی شرکت، اجلاس میں مجوزہ فلیگ شپ منصوبے پر عمل درآمد کے سلسلے میں دستیاب مختلف آپشنز کا جائزہ لیا گیا ۔اجلاس میں منصوبے پر عمل درآمد کے لیے زمین کی خریداری کا عمل شروع کرنے کا فیصلہ ہوا۔ محکمہ خزانہ کو زمین کی خریداری کے لیے ابتدائی طور پر 2 ارب روپے کی رقم جاری کرنے کی ہدایت کی گئی۔ منصوبے کے لیے پشاور اور ڈی آئی خان دونوں اطراف سے بیک وقت زمین کی خریداری کا عمل شروع کرنے کا فیصلہ بھی کیا گیا ۔ وزیراعلٰی کو مجوزہ فلیگ شپ منصوبے کے مختلف پہلوؤں پر تفصیلی بریفنگ دی گئی۔ بریفنگ میں بتایا گیا کہ 365 کلومیٹر طویل یہ موٹروے 6 لینز پر مشتمل ہوگا، اس موٹروے پر 19 انٹرچینجز اور 2 ٹنلز تعمیر کئے جائیں گے، یہ موٹروے 7 اضلاع کو ایک دوسرے سے جوڑے گا، منصوبے کی تعمیر پر 348 ارب روپے کی تخمینہ لاگت آئے گی۔وزیر اعلٰی علی امین گنڈاپور نے کہا کہ پشاور ڈی آئی خان موٹروے صوبائی حکومت کا فلیگ شپ منصوبہ ہے، یہ منصوبہ صوبے کی معاشی ترقی میں ایک سنگ میل ثابت ہوگا، اس موٹروے کی تعمیر سے صوبے میں معاشی اور کاروباری سرگرمیوں کو فروغ ملے گا۔ منصوبے کی تکمیل سے نہ صرف لوگوں کو ٹرانسپورٹ کی معیاری سہولیات فراہم ہونگی بلکہ روزگار کے مواقع بھی فراہم ہونگے، مجوزہ موٹروے کی تعمیر کے لئے متعلقہ محکمے مل بیٹھ کر قابل عمل تجاویز حتمی منظوری کے لئے پیش کریں۔
