کمشنرنے’’ڈسٹرکٹ انڈسٹریل ری لوکیشن‘‘کمیٹی قائم کردی منصوبہ بندی کا مقصد فضائی آلودگی،صنعتوں کےآلودہ پانی کی مینجمنٹ،ٹریفک مسائل اور عوامی صحت جیسے چیلنجز سے نمٹنا ہے
ڈویژنل انتظامیہ فیصل آباد نے پائیدار صنعتی ترقی اور لانگ ٹرم اربن پلاننگ کے لیے ایک بڑا اقدام کرتے ہوئے ڈسٹرکٹ انڈسٹریل ری لوکیشن کمیٹی قائم کر دی ہے۔ کمشنر فیصل آباد راجہ جہانگیر انور کی ہدایت پر کمیٹی کا باقاعدہ نوٹیفیکیشن جاری کر دیا گیا ہے۔ کمیٹی سرکاری سطح پر فیصل آباد چیمبر آف کامرس، سائزنگ ایسوسی ایشن، اپٹما اور سمال انڈسٹریز سمیت متعلقہ سٹیک ہولڈرز سے مشاورت اور جامع سروے کے ذریعے صنعتی یونٹس کو شہر سے باہر منتقل کرنے کے لیے سازگار آپریشنل ماحول، مراعات اور سہولیات سے متعلق قابلِ عمل تجاویز مرتب کرے گی۔ اس کے ساتھ ساتھ صنعتوں کی منتقلی کے لیے مشترکہ روڈ میپ، صنعتی زونز میں مناسب انفراسٹرکچر، سہولیات کی فراہمی، اراضی کے حصول اور منتقلی کا پلان بھی تیار کیا جائے گا۔ منصوبے کا مقصد فضائی آلودگی، صنعتی آلودہ پانی کی مینجمنٹ، ٹریفک مسائل اور عوامی صحت کو درپیش چیلنجز سے نمٹنا ہے۔ ڈائریکٹر جنرل ایف ڈی اے کمیٹی کے کنوینر جبکہ ڈسٹرکٹ آفیسر انڈسٹریز سیکرٹری ہوں گے، جبکہ دیگر ممبران میں ایڈیشنل کمشنر کوآرڈینیشن، ڈائریکٹر پنجاب سمال انڈسٹریز کارپوریشن، ڈائریکٹر لیبر، ڈپٹی ڈائریکٹر تحفظِ ماحول، میونسپل آفیسر پلاننگ، جی ایم ٹیکنیکل فیڈمک، نیشنل ٹیکسٹائل یونیورسٹی اور گورنمنٹ کالج یونیورسٹی کے نامزد نمائندے شامل ہیں۔ کمیٹی رہائشی علاقوں میں فضائی و شور آلودگی اور زہریلا کیمیکل زدہ پانی خارج کرنے والی صنعتوں کی منتقلی کے لیے خصوصی سروے بھی کرے گی۔
