سندھ حکومت 10 مارچ 2025 کو گرین لائن اور اورنج لائن بی آر ٹی کا باضابطہ کنٹرول سنبھال لے گی
سندھ ماس ٹرانزٹ اتھارٹی بورڈ نے گرین لائن اور اورنج لائن بی آر ٹی کا کنٹرول سنبھالنے کی منظوری دے دی۔ سینئر وزیر شرجیل انعام میمن کی صدارت سندھ ماس ٹرانزٹ اتھارٹی بورڈ کا 14واں اجلاس منعقد ہوا۔اجلاس میں میئر سکھر ارسلان اسلام شیخ، میئر حیدرآباد کاشف شورو، سیکریٹری ٹرانسپورٹ اسد ضامن، منیجنگ ڈائریکٹر ایس ایم ٹی اے کمال دایو شریک ہوئے۔ممبر پلاننگ اینڈ ڈویلپمنٹ سکندر شیخ، ڈی آئی جی ٹریفک پیر محمد شاہ، کنسلٹنٹس اور دیگر اہم اسٹیک ہولڈرز نے بھی اجلاس میں شرکت کی۔اجلاس میں شریک ماہرین نے گرین لائن اور اورنج لائن بی آر ٹی کے مؤثر انتظام کے لیے اپنی تجاویز پیش کیں۔گرین لائن اور اورنج لائن بی آر ٹی کے معاہدے سے متعلق دستاویزات قانونی توثیق کے لیے محکمہ قانون کو بھیجنے پر تبادلہ خیال کیا گیا۔گرین لائن اور اورنج لائن بی آر ٹی کا موجودہ ہیومن ریسورس کا ڈھانچہ تین ماہ تک رکھنے کی منظوری دےدی گئی 
۔سندھ حکومت عوام کو جدید اور معیاری سفری سہولیات فراہم کرنے کے لیے پرعزم ہے، شرجیل انعام میمن نے کہا کہ گرین لائن اور اورنج لائن بی آر ٹی کی منتقلی سے عوامی ٹرانسپورٹ کا نظام مزید بہتر ہوگا ۔حکومت سندھ گرین لائن اور اورنج لائن بی آر ٹیز کو مزید ترقی دینے کے لئے کام کرے گی۔عوام کا تیز، آرامدہ اور بہترین سفری سہولیات کی فراہمی کے لئے ہم ٹرانسپورٹ کے شعبے میں مزید اصلاحات لا رہے ہیں۔
سندھ حکومت تمام ضروری وسائل بروئے کار لاتے ہوئے اس نظام کو مزید مستحکم اور مؤثر بنائے گی۔
