لاہور ویسٹ مینجمنٹ کمپنی کی جانب سے حضرت سخی مادھو لال حسین(رح) کے 437 ویں سالانہ عرس پر شالیمار ٹاؤن میں صفائی کے خصوصی انتظامات کیے جا رہے ہیں۔تین روزہ عرس تقریبات کے پیشِ نظر ایل ڈبلیو ایم سی کے50 سے زائد ورکرزاور20 سے زائد گاڑیاں دربار کے اطراف خصوصی صفائی آپریشن پر تعینات ہیں۔12 سے 14 اپریل تک جاری عرس تقریبات کے پیشِ نظر ایل ڈبلیو ایم سی کا عملہ تینوں شفٹوں میں صفائی فرائض سر انجام دینے کے لیے ڈیوٹی پر موجود رہے گا۔
سی ای او ایل ڈبلیو ایم سی کی ہدایت پر دربار سے ملحقہ راستوں پر فینائل ملے پانی سے واشنگ اور چونے کا چھڑکاؤ بھی کیا جا رہا ہے۔ مزید برآں وزیرِ اعلیٰ پنجاب مریم نوز شریف کے وژن ستھرا پنجاب پر عملدرآمد یقینی بنانے کے لیے عرس تقریبات کے دوران اطراف کے راستوں، بازاروں اور گلیوں میں بھی خصوصی صفائی آپریشن کیا جارہا ہے۔شہریوں کی سہولت کے لیے دربار کے روٹس پر موجود کنٹینرز کلیئرنس کو بروقت یقینی بنایا جا رہا ہے،جبکہ دربار کے اندرونی و بیرونی حصوں میں بھی خصوصی صفائی اور دھلائی کی جارہی ہے۔ سی ای او بابر صاحب دین کا کہنا ہے کہ عرس میں شرکت کرنے والے زائرین کو صاف ستھرا ماحول فراہم کرنے کیلئے پر عزم ہیں۔دربار آنے والے زائرین سے گزارش ہے کہ ایل ڈبلیو ایم سی ٹیموں کا ساتھ دیں، کوڑا نصب کردہ کوڑے دان میں ڈالیں یا ایل ڈبلیو ایم سی عملے کے حوالے کریں۔
