کوئٹہ: وزیر اعلیٰ بلوچستان میر سرفراز بگٹی نے میڈیا سے گفتگو کرتے ہوئے کہا ہے کہ حکومت نے آئندہ مالی سال کے بجٹ کی تیاری کا آغاز کر دیا ہے، جس میں کوئٹہ کی ترقی کو اولین ترجیح دی جائے گی۔ اُنہوں نے کہا کہ کوئٹہ پروجیکٹ کے تحت مختلف ترقیاتی منصوبوں میں تاخیر کی بنیادی وجہ بعض ٹھیکہ داروں کی عدم سنجیدگی ہے۔ وزیر اعلیٰ نے خبردار کیا کہ جو کمپنیاں یا ٹھیکہ دار مقررہ ٹائم لائن یا معیار پر پورا نہیں اتریں گے، انہیں بلیک لسٹ کر دیا جائے گا۔ اب وقت آ چکا ہے کہ بلوچستان کو حقیقی ترقی کی راہ پر گامزن کیا جائے، اور ترقیاتی عمل میں کسی قسم کی سستی یا تاخیر برداشت نہیں کی جائے گی۔ اُنہوں نے وزیر اعظم پاکستان کا شکریہ ادا کیا کہ بلوچستان میں شاہراہوں کی تعمیر کے لیے خصوصی فنڈز مختص کیے گئے ہیں۔ وزیر اعلیٰ نے کہا کہ بلوچستان کے عوام اس عمل پر پاکستان کے ہر فرد کے شکر گزار ہیں۔مانگی ڈیم سے متعلق بات کرتے ہوئے وزیر اعلیٰ نے کہا کہ ڈیم پر کام جاری ہے، اور اس کی تکمیل کے بعد کوئٹہ میں پانی کی قلت کا مسئلہ بڑی حد تک حل ہو جائے گا۔ سمی دین سے متعلق سوال پر وزیر اعلیٰ نے وضاحت کی کہ سمی دین نے پاکستانی جھنڈا جلانے کی تردید کی ہے، تاہم جھنڈے کو نظر آتش کرنے والی خاتون بہرحال بی وائی سی کی ہی کوئی کارکن تھی۔ انہوں نے کہا کہ ان کی بات کا مقصد کسی فرد کو نشانہ بنانا نہیں بلکہ بی وائی سی کے عزائم کو بے نقاب کرنا تھا، تاکہ ان لوگوں کو حقائق سے آگاہ کیا جا سکے جو اسے پرامن احتجاجی تنظیم قرار دیتے ہیں۔
